پەیمانگای تەکنیکی سلێمانی

پەیمانگای تەکنیکی سلێمانی:

وەك ناوەندێكی ئەكادیمی و زانستی، لە ساڵى 1973 لە شـاری سلێمانى دامەزراوە، تاساڵى 1980–1981 بەردەوام بووە لە پێگەیاندنی كادیری ئەكادیمی بۆ كۆمەڵگا، لەگەڵ راگواستنى زانكۆى سلێمانى بۆ پارێزگاى هەولێر لە ساڵى 1981 ئەم پەيمانگايەش هەڵوەشايەوە، بەشە زانستييەكانى، بەسەر پەيمانگاكانى (موصڵ وبەغداو عمارە)دا دابەشكران، پاشان بەپێى برِيارى ژمارە 619 لە رۆژی (22/6/1988)، بۆ جارى دووەم لە شاری سلێمانی پەیمانگاكە دامەزرايەوە، ئەمەش بەهەڵوەشاندنەوەى پەيمانگاى تەندروستی باڵا (معهد الصحة العالي)ى سەر بەوەزارەتى تەندروستيى، دواتر لكاندنى بە دەستەى پەيمانگا تەكنيكييەكانى سەر بەوەزارەتى خوێندنى باڵا و توێژينەوەى زانستى.

لە يەكەم ساڵى خوێندنى (1988– 1989)دا، بەشێكی پزيشكى بەناوى (بەشى تەكنيكاريى تەندروستى)كرایەوە، ساڵى دواتر بەشەكانى (پەرستارى و ميكانيك و كارِگێرِيی گەنجينە) كرانەوە، بەشى  تەكنيكارى تەندروستی لەساڵى خوێندنى (1990 – 1991) گۆڕا بە بەشى تەندروستى كۆمەڵ (صحة المجتمع).

پاش راپەڕينی ساڵى (1991)وهەڵبژاردنى پەرلەمانى كوردستان ودامەزراندنى حكومەتى هەرێمى كوردستان، ئەم پەيمانگايە وەك هەر پەيمانگاو زانكۆيەكیترى كوردستان خرايە سەر ئەنجومەنى خوێندنى باڵاى سەر بە سەرۆكايەتى ئەنجومەنى وەزيرانى حكومەتى هەرێمى كوردستان.

لە ئێستادا بەهۆى هەوڵ و ماندوبوونى مامۆستايان وكارمەندان، بەيارمەتى وپشتگيرى زانكۆی پۆلیتەكنیكی سلێمانیو وەزارەتى خوێندنى باڵاو توێژينەوەى زانستى حكومەتى هەرێمى كوردستان، ئەم پەيمانگايە پەرەى بەخۆى داوەو پێشكەوتنى لە بوارە زانستى و تەكنيكيەكاندا بە خۆیەوە بينيوە، لەڕووى گەشەكردنى زانستى مامۆستايان و كارمەندانى تەكنيكى بەشە زانستييەكان، پێشكەوتنی گەورەی زانستی بەدەستهاتووە، لەماوەی ساڵانى رابردوودا، مامۆستايان و تەكنيكيیەكانى پەيمانگا لەهەڵگرانى بڕوانامەى ماجستێرو دكتۆرا ژمارەيان زياديكردووە و چەندين مامۆستاو ستافی کارگێڕی و هونەرى مۆڵەتى خوێندنيان وەرگرتووە بۆبەدەستهێنانى بڕوانامەى  (ماجستێر و دكتۆرا) لە زانكۆكانى هەرێم و دەرەوەى كوردستان .

دیدگا:

دیدگای پەیمانگا (تەکنیکارێکی پێشەنگ وبەرهەمدارە)، بەجۆرێك خوێندن و پێداویستی كۆمەڵگاو بازاڕو دەستی كاری پێكەوە بەستووەتەوە. کەواتە دروستکردنی مرۆڤ وگەشەپێدانی کۆمەڵگا بۆ دروستکردنی نەوەکانی توانای بنیاتنانی وڵات ومامەڵەکردن لەگەڵ پێداویستییەکانی بازاڕی کار وتەکنەلۆژیای زانیاری لە بوارەکانی تەکنیکی پزیشکی وتەکنەلۆژی وکارگێڕیدا. ئەرکی پەیمانگاکە بۆ ئامادەکردنی کادیری تەکنیکی شارەزا لەبوارە تەکنیکی وکارگێڕی وجۆراوجۆرەکانی پزیشکی کارپێکراو، کە بە زانیاری ولێهاتوویی پێویست تەیارکراون بۆ بەشداریکردن لەپرۆسەی ئاوەدانکردنەوەدا. بەرزکردنەوەی ڕۆڵی پەروەردەی تەکنیکی وکاریگەرییەکەی لە کۆمەڵگەی مەعریفە وپەروەردەدا. هەروەها ڕێباز وسیستەم ومەنهەجی پراکتیکی دەگرێتەبەر کە توانای بەهێزکردنی پێکهاتەی هێزە تەکنیکیەکان لە وڵات ونوێکردنەوەی بەردەوامی مەنهەجی تیۆری وبەکارهێنانی زانستی هەیە. هەروەها فراوانکردنی بازنەی چالاکیی زانستی و پراکتیکی بە ئاراستە جۆراوجۆرەکانیدا لەڕووی بابەتیی وکۆمەڵایەتییەوە. لە کۆتاییدا دامەزراندنی پەیوەندیی هاوکاری وپەیوەندی وکارلێککردن لە نێوان پەیمانگا وتوێژەکانی کۆمەڵگا وئۆرگانە هاوتاکان لە ئاستی ناوخۆیی وجیهانیدا.

ئامانجی پەیمانگا:

ئامانجی پەیمانگا پێگەیاندنی كادیری تەكنیكی ناوەندییە، كە شارەزابێت لـەبوارە زانستی و پسپۆرییە جیاوازەكـانی (كارگێڕی و تەكنۆلۆجی و پزیشكی)دا. بۆ سەرجەم فەرمانگە حكومی و ناوەندە جیاوازەكانی كەرتی تایبەت، بۆئەوەی برەوبدەن بە ئاوەدانكردنەوەی كوردستان. دەرچووانی پەیمانگا دوای دوو ساڵ خوێندنی زانستی و تەكنیكی لە پسپۆرییە جیاوازەكانداو پاش ئەنجامدانی مەشقی پراكتیكی بۆ ماوەی دوو مانگ، بڕوانامەی دبلۆمی تەكنیكیان پێدەبەخشرێت لەو پسپۆرییانەدا. پەیمانگا ساڵانە چەندین خولی زانستی و كارگێڕی و دارایی و (سیمینار و ۆرك شۆپ) بۆ مامۆستایان و فەرمانبەرانی پەیمانگا دەكاتەوە بۆ زیاتر شارەزابوونیان و گرنگیدان و ئاگاداربوون لەو گۆڕانكارییانەی كە لە بوارە جیاوازەكاندا روودەدات .

بەشەكانی پەیمانگای تەكنیكی سلێمانی:

پەیمانگای تەكنیكی سلێمانی پێکدێت لە ١٦ بەش (بەیانیيان):

بەشە پزیشكییەكان:

1. بەشی تەندروستی گشتی
2. بەشی شیكاری نەخۆشییەكان
3. بەشی دەرمانسازی
4. بەشی پەرستاری ددان
5. بەشی پەرستاری
6. بەشی سڕكردن
7. بەشی ڕادیۆلۆجی
8. بەشی پەرستاری ژنان ومناڵبوون
9. بەشی پەرستاری منداڵان

 بەشە تەكنۆلۆجییەكان:

1. بەشی میكانیك CAD-CAM
2. بەشی رووپێوی
3. بەشی وێنەی ئەندازەیی
4. بەشی تەكنیكی كارەبا

 بەشە كارگێڕی یەكان:

1. بەشی كارگێری كار
2. بەشی ژمێریاری
3. بەشی تەکنيکی ميديا

پەیمانگای تەكنیكی سلێمانی پێکهاتووە لە ٨ بەشی (ئێواران):

بواری پزیشکی:

1. تەکنەلۆژیای تاقیگەی پزیشکی
2. دەرمانسازی
3. پەرستاری ددان
4. پەرستاری

بوارەکانی ئەندازیاری:

1. تەکنیکی کارەبا

بوارەکانی کارگێڕی:

1. کارگێڕی کار
2. ژمێریاری
3. تەکنیکی میدیا