“زانکۆی پۆلیتەکنیکی سلێمانی بە باشترین توانای مرۆیی و پێشکەوتووترین تەکنەلۆجیا، داهاتوویەکی گەشتر فەراهەم دەکات”
خۆم بە خۆشحاڵ دەزانم و جێگەی شانازییە بۆ من کە سەرۆکایەتی دامەزراوەیەکی گرنگی خوێندنی باڵای وەکو زانکۆی پۆلیتەکنیکی سلێمانی دەکەم. زانکۆی پۆلیتەکنیکی سلێمانی زانکۆیەکی تەکنیکی گشتی و گشتگیرە کە فێربوونی چالاک و کردەکی کردۆتە بنەمایەک بۆ پێشخستنی کارامەیی و ئاستی زانستی خوێندکارەکانی و هاوکات گرنگی دەدات بە پێگەیاندن و بەهێزکردنی زانستخوازی بەردەوام بە مەبەستی سەرکەوتنیان لە ژیانی کەسیی و پیشەی داهاتویان وەک کەسی داهێنەر و پێشکەوتوخواز و تاکی بەرپرسیار. وەک سەرۆکی زانکۆ بە تەواوی پابەندم بە هەوڵدان بۆ ڕەخساندنی دەرفەتی ئەکادیمی یەکسان و فەراهەم کردنی دەستکەوتی ئەکادیمی بۆ زانکۆمان کە ئەمانەش بەردی بناغەی سێکتەری خوێندنی باڵان. هەروەها بە پەرۆشییەوە بڕوامان بە پرۆسەی فێربوونە کە خوێندکار تیایدا سەنتەر بێت و لەو سونگەیەشەوە دەرفەت بڕەخسێنین و هانی خوێندکاران بدەین بۆ بەدەست هێنانی ئامانجەکانیان لەبەر ئەوەی درک بەو ڕاستییە دەکەین کە بێجگە لە ژیانی ئەکادیمییان پێویستیان بە پشتگیری ئێمە هەیە تاکو بتوانن ژیانێکی شایستە بۆ خۆیان دابین بکەن. زانکۆی پۆلیتەکنیکی سلێمانی نەک تەنها ئەزمونێکی فێرکردنی سەرکەوتو دەڕەخسێنێت بۆ خوێندکارەکان بەڵکو یارمەتییان دەدات تاکو ببنە تاکێکی بیرفراوان و بە سەرکەوتووی بتوانن ڕوبەڕوی ئەو کۆسپ و تەگەرانەی بەردەمیان ببەوە. مامۆستایان و فەرمانبەرانی زانکۆی پۆلیتەکنیکی سلێمانی بە پەرۆشەوە کار بۆ بەرەو پێشچوونی ڕەوتی زانستی زانکۆکەمان دەکەن. بەندە وەک سەرۆکی زانکۆ بڕوای تەواوم بە کاری پێکەوەیی و تیم هەیە تاکو بە هەوڵی هەموو لایەکمان زانکۆکەمان بەرەو پێشتر بەرین.
لەگەڵ ڕێزدا،
