– بەشی تەکنیکی ژمێریاری لە ساڵی (٢٠٠٣-٢٠٠٤)دامەزراوە، لە ساڵی یەکەمدا نزیکەی ٣٥ فێرخواز وەرگیراون لەم بەشە.
– لە ساڵی ٢٠٠٧ یەکەم خولی دەرچووان بڕوانامەی بەکالۆریۆسیان لە زانستی تەکنیکی ژمێریاری وەرگرت.
– لە ساڵی (٢٠١٧-٢٠١٨) یەکەم خولی خوێندنی باڵا (ماستەر) کرایەوە و چوار خوێندکار وەرگیران.
– لە ساڵی ٢٠٢٠ یەکەم خولی فێرخوازان لە خوێندنی باڵا (دکتۆرا) کرایەوە و ژمارەیان چوار فێرخواز بوو.
پەیامی بەش:
بەشی تەکنیکی ژمێریاری یەکێکە لە بەشەکانی کۆلێژی تەکنیکی کارگێری/ زانکۆی پۆلیتەکنیکی سلێمانی. کار و ئامانجی سەرەکی بەش پێگەیاندنی کادیری ئەکادیمی و پیشەیی زانستی ژمێریارییە لە ئاستەکانی خوێندنی بەرایی (بەکالۆریۆس) و خوێندنی باڵا (ماستەر و دکتۆرا)دا، تا بتوانن بەسانایی پەیوەست بن بە بازاری کارەوە. لەم بەشەدا، هەوڵ دەدرێت بەشێوەیەکی مۆدێرن و سەردەمیانە بابەتەکانی تایبەت بە زانستی ژمێریاری بخوێنرێت و بەجۆرێک لەگەڵ پێداویستییەکانی ڕۆژی بازاڕی کاردا بگونجێت و زیاترین هەلی کار بۆ دەرچووانی بەش بڕەخسێت.
دیدی بەش:
بەشی تەکنیکی ژمێریاری بەخەرمانێک لە ئەزموونی چەندین ساڵە و هەبوونی کادری ئەکادیمی خاوەن بڕوانامەی بەرزی ژمێریاری و بوارە پەیوەندیدارەکان هەمیشە لە هەوڵدایە بۆ زیاتر گەشەکردن و برەوپێدانی پڕۆگرامەکانی خوێندن کە گونجاو و هاوتەریبی ئەو ئەزموونانە بێت کە لەدنیای پێشکەوتووی ئەمڕۆی بواری ئابووری و بازرگانی و دارایی بوونیان هەیە و کاریان پێ دەکرێت.
بەشی تەکنیکی ژمێریاری یەکێکە لە بەشە گرنگەکانی زانکۆی پۆلیتەکنیکی سلێمانی، کە بەشدارێکی کارایە لە بەدیهێنانی ئەو ئەرک و ئامانجە لەپێشینانەی زانکۆی پۆلیتەکنیکی سلێمانی کە هەوڵ و تواناکانی خستووەتە گەڕ بۆ بەدیهێنانیان. بەم تێڕوانینەوە، ستافی ئەکادیمی و بەڕێوەبەریی بەش هەمیشە لە هەوڵی نوێکردنەوە و بەرەو پێشچوونی ئاستی پرۆگرامی خوێندنی زانستی ژمێریاریی و پێشکەشکردنی توێژینەوەی ئاست بەرزی زانستییدان تا بتوانرێ پێداویستییەکانی بازاڕی دارایی دابین بکرێت و هەلی کاری زیاتریش بۆ خوێندکارانی بڕەخسێنێت.
پڕۆگرامی خوێندن
بەشی تەکنیکی ژمێریاری پێواژۆی بۆلۆنیا پەیڕەو دەکات کە ئەم سیستەمە هۆکارێکی گرنگە بۆ گەشەکردنی تواناکانی خوێندکار لەڕووی جۆرایەتییەوە، لە دواجاریشدا یارمەتیدەوە بۆ پێشکەوتنی جۆری و چەندایەتی کاروباری بازرگانی و دارایی و ئابووری. ماوەی خوێندنی بەرایی(بەکالۆریۆس) هەشت کۆرسە (چوارساڵە). پڕۆگرامەکانی خوێندن لە کۆرسەکاندا بەشێوەی ئەکادیمی داڕێژراون کە بازاڕی کار و هەلی کار لەبەرچاوگیراوە.
