مامۆستایەکی زانکۆی پۆلیتەکنیکی سلێمانی وەک شارەزا بانگھێشت دەکرێت بۆ کۆبوونەوە و سیمینارێکی ڕاوێژکاری نێودەوڵەتی لە بارەگای نەتەوەیەکگرتووەکان

دوابەدوای ئەندامێتی و چالاکیەکانی لە ڕێکخراوی نێودەوڵەتی RASHID International ی ئەڵمانی بۆ پاراستنی کەلەپووری، د.ڕۆژین کەمال محمد ئەمین مامۆستا و توێژەری کارا لە بەشی پلانسازی شار و سەرپەشتیاری سەنتەری توێژینەوەی زانستی زانکۆمان وەک شارەزای بواری پاراستنی کەلەپووری لە لایەن سەرۆکی ڕێکخراوە نێو دەوڵەتیەکەوە وە بانگھێشتکرا بۆ بەشداریکردن لە کۆبوونەوەیەکی ڕاوێژکاری داخراو و یەکەمسیمیناری ئەنجومەنی مافی مرۆڤی نەتەوەیەکگرتووەکان سەبارەت بە پاراستنی کەلەپووری لە ڕۆژانی ٦ و ٧ ی تەممووز لە شاری جنێف لە سویسرا. کۆ بوونەوە داخراوەکەی شارەزایانی پاراستنی کەلەپووری لە ٦/٧/٢٠١٧ دا بەسەرۆکایەتیبڕیاردەری تایبەت بە مافی کەلەپووری نەتەوە یەکگرتووەکان (پرۆفیسۆر کەریمە بینۆنی زانکۆی کالیفۆرنیا) و بە ئامادەبوونی ١٧ شارەزا لە ڕێکخراوە نێودەوڵەتیەکانی وەک یونسکۆ و چەند مۆزەخانە و زانکۆ یەکی بەریتانی و ئەوروپی و ئەمەریکی و زانکۆی پۆلیتەکنیکی سلێمانی بەڕێوەچوو وەک ئامادەکاری بۆ سیمینارە بەر فراوانەکەی ڕۆژی دواتر.لە لیستی ناوی دەزگای بەشداربووانی کۆبوونەوەکەدا ، زانکۆی پۆلیتەکنیکی سلێمانی تاکە دەزگای بەشداربوو بوو لە ھەرێمی کوردستان و تەنانەت خۆرھەڵاتی ناوەڕاستەوە. لە نێوان پێشنیارەکانی د. ڕۆژین دا بۆ بڕیاردەری تایبەت ، بەستنەوەی تاکەکانی کۆمەڵگەیە بە پاراستن و گەشەی کەلەپوورییەوە لە ڕێگەی بەرزکردنەوەی ئاستی ھۆشیاری و بەشداری پێکردن و فێرکردنیانەوە . وە د. ڕۆژین پێی وایە ئەوەش بەدەست دەھێنرێت لە ڕێگەی چالاک کردنی مۆزەخانەکان و گرنگیدان بە توێژینەوەی مۆزەخانە و پاراستنی کەلەپووری و گەشەپێدانی سێکتەری گەشتیاری کەلەپووری و شوێنەوار و بینا کەلەپووری و مێژووییەکان بۆ ڕاکێشانی سەردانکەری ناوخۆیی و گەشتیاری نێودەوڵەتی کە جگە لە پتەوکردنی پاراستنی کەلەپووری دەشبنە ھۆی دروستکردنی ھەلی کار و ئابووری بە تایبەتی لە عێراق و ھەرێمی کوردستان دا. وە لە کۆتایی کۆبوونەوە داخراوەکەدا، بڕیاردەری تایبەت بە مافی کەلەپووری نەتەوە یەکگرتووەکان سوپاسی د. ڕۆژین کەمال ی کرد وەک نوسەری سەرەکی ڕاپۆرتێکی ڕاوێژکاری بانگھێشتکراو کە بە ھاوکاری چەند کەس و ئەکادیمییەک لە ڕێکخراوی RASHID International و کوردستانەوە ئامادەی کردبوو سەبارەت بە کاریگەری توندڕەوی لەسەر مافی کەلەپووری ژنان. وە ئەو ڕاپۆرتە بەکاردەھێنرێت بۆ ئامادەکردنی ڕاپۆرتێکی بەر فراوان کە لە لایەن پرۆفیسۆر کەریمە بینۆنی لە کۆبوونەوەی گشتی نەتەوەیەکگرتووەکان لە مانگی ١٠ ی ئەمساڵدا پێشکەش دەکرێت. سیمینارە رکەی ٧/٧/٢٠١٧ یش کە لەلایەن ٩ پانێلیستەوە پێشکەش کرا، بە ئامادەبوون و بەشداری نوێنەری دیبلۆماسی ٣٦ ووڵات و نوێنەری ڕێکخراوەکانی سەر بە UN و ڕێکخراوە نێودەوڵەتی و مەدەنییەکان و دەەزگا ئەکادیمی و لایەنە پەیوەندیدارەکانی پاراستنی کەلەپووری بەڕێوە چوو کە تیای دا شارەزا و بەشداربووەکان بیرو ڕا و پێشنیاری خۆیان پێشکەش بە بڕیاردەری تایبەت بە مافی کەلەپووری نەتەوە یەکگرتووەکان دەکرد بۆ ئامادەکردنی ڕاپۆرتێک و پێشکەش کردنی لە ٣٦ ھەمین کۆبوونەوەی ئەنجوومەنی مافی مرۆڤ کەلە مانگی ئاداری ٢٠١٨ دا بەڕێوە دەچێت. زانیاری زیاتر لەسەر سیمینارەکە لەم لینکەدا یە: http://www.ohchr.org/EN/Issues/ESCR/Pages/CulturalRightsProtectionCulturalHeritage.aspx لە کۆبوونەوە و سیمینارەکەدا جەخت لەسەر گرنگی مافی کەلەپووری و بەستنەوەی بە مافی مرۆڤەوە کرایەوە تاوەکو تێکدەر وپێشێلکاری مافی کەلەپووری ڕووبەڕووی ھەمان ڕێکاری یاسایی نێودەوڵەتی ببێتەوە کە پێشێلکاری مافی مرۆڤ ڕووبەڕووی دەبێتەوە. لە میانەی گەشتەکەی دا، د. رۆژین بە یاوەری سەرۆکی ڕێکخراوی RASHID International پڕۆفیسۆر رۆجەر ماسیۆس (سەرۆک بەشی شوێنەوار لە زانکۆی ڕێدینگی بەریتانی) و د. ئەیمی ریچردسۆن (لە زانکۆی ئۆکسفۆرد) چەند کۆبوونەوە و چاوپێکەتنێکی تریان ئەنجام دا لەگەڵ چەند کەسایەتیەکی دیبلۆماسی و پڕۆفیشناڵی و داکۆکیکار لە بواری پاراستنی کەلەپووری بە مەبەستی بەشدار پێکردن و بەھێزکردنی ڕۆڵی دەزگا ئەکادیمیەکان و زانکۆ ناوخۆییەکانی عێراق و ھەرێمی کوردستان لە پاراستنی کەلەپووری و بەرزکردنەوەی ئاستی ھۆشیاری خەڵک بەرامبەر بە ڕۆڵ و گرنگی پاراستنی کەلەپووری بۆ زیندوو ھێشتنەوەی کەلەپوور وکەلتووری نەتەوەیی بۆ نەوەکانی داھاتوو و سوودی ئابووریش . وەلەکاتی ناسین و گفتوگۆی لەگەڵ چەند کەسایەتی و شارەزا ی دەزگا و زانکۆ نێودەوڵەتیەکان ، د. ڕۆژین ئاگادار کرایەوە لە ناوی شارەزا و چەند دەزگایەک کە گرنگی دەدەن بە پاراستنی کەلەپووری لە عێراق و ھەرێمی کوردستان بۆ دروستکردنی ھەلی پڕۆژەی ھاوبەشی نێوان ئەو کەس و دەزگا نێودەوڵەتیانە لە گەڵ زانکۆی پۆلیتەکنیکی سلێمانی و سەنتەری توێژینەوە. ئاماده‌كردنی : ڕاگه‌یاندنی زانكۆ سۆران حه‌سه‌ن