سەرۆکی ژووری بازرگانی و پیشەسازی سلێمانی، سوپاسنامەو هێمای ڕێزلێنانی بەخشییە مامۆستا ئەیوب کەریم بەڕێوەبەری سەنتەری پەرەپێدانی کار لە زانکۆی پۆلیتەکنیکی سلێمانی
سەنتەری پەرەپێدانی کار (CDC) لە زانکۆی پۆلیتەکنیکی سلێمانی پردێکی بەهێزە لە نێوان سێکتەری ئەکادیمی و بازاڕی کاردا. ئەم سەنتەرە بە چاودێری و سەرپەرشتی ڕاستەوخۆی پ.د.هوشیار عبداللە عزیز سەرۆکی زانکۆی پۆلیتەکنیکی سلێمانییەو، لە چوارچێوەی گرنگیدانی بەردەوامی زانکۆدایە بۆ بەهێزکردنی پەیوەندی نێوان زانکۆ و دام و دەزگاکان و کەرتی تایبەت.
سەنتەری پەرەپێدانی کار (CDC) بەردەوامە لە ئەنجامدانی چالاکی و بەدیهێنانی دەستکەوتی نوێ هەروەها توانیویەتی وەک ناوەندێکی کاریگەر لەنێو بازاڕی کاردا پێگەی خۆی جێگیر بکات. سەنتەرەکە بە دیدگایەکی فراوانەوە کاردەکات بۆ دۆزینەوەی هەلی کار بۆ دەرچووان و بەستنەوەی توانا ئەکادیمییەکان بە پێداویستییەکانی بازاڕەوە، ئەمەش لە ڕێگەی دروستکردنی پەیوەندی بەهێز لەگەڵ کۆمپانیاکان و دامەزراوە پیشەییەکان.
هەوڵەکانی سەرۆکی زانکۆ و تیمەکانی سەنتەری پەرەپێدانی کار، وەک هەنگاوێکی ستراتیژی دەبینرێت بۆ کەمکردنەوەی جیاوازی نێوان خوێندنی تیۆری و پراکتیکی بە ئامانجی ئەوەی دەرچووانی زانکۆمان بە توانا و شارەزایی تەواوەوە ڕوو لە بازاڕی کار بکەن و ببنە جێگەی متمانە لە کەرتی تایبەتدا .
ئەمڕۆش ڕێکەوتی ( ١٨ / حوزەیران / ٢٠٢٦) لە مەراسیمێکی تایبەتدا (نەوزاد غەفور ڕەباتی) سەرۆکی ژووری بازرگانی و پیشەسازی سلێمانی ڕێزلێنانی بەخشییە مامۆستا (ئەیوب کەریم) بەڕێوەبەری سەنتەری پەرەپێدانی کار CDC، وەک سوپاس و پێزانینێک بۆ ئەو هاوکاری و پاڵپشتی و هەماهەنگییە بەردەوامەی کە ناوبراو لە ماوەی ڕابردوودا پێشکەشی ژووری بازرگانی و پیشەسازی سلێمانی کردووە، بەتایبەت لە ڕێکخستن و وتنەوەی خولی تایبەتە بە پەرەپێدانی تواناکان بۆ کارمەندانی ژووری بازرگانی، هاوکات ڕێزلێنیش بەخشرایە د.سەرخێڵ سیروان – ستافی سەنتەری پەرەپێدانی کار لەبەرامبەر بەشداریکردنی لە وۆرکشۆپێکی تایبەت بە ژووری بازرگانی.
هەروەها سەرۆکی ژووری بازرگانی سوپاس و دەستخۆشی خۆی ئاراستەی سەرۆکایەتی و مامۆستایانی زانکۆی پۆلیتەکنیکی سلێمانی کرد، کە هەمیشە وەک ناوەندێکی زانستیی گرنگ، هاوکار و پشتیوانی پرسە ئابووری و بازرگانییەکانی ناوچەکە بوون.
سەرۆکی ژووری بازرگانی هیواشی خواست ئەم هەماهەنگییە لەگەڵ زانکۆدا بەردەوام بێت و، جەختی لە گرنگی ڕۆڵی زانکۆ کردەوە لە پێگەیاندنی کادری لێهاتوو و بۆ ناو بازاڕی کار، بە شێوازێک کە بتوانن پێداویستی و خواستە نوێیەکانی بازاڕی کوردستان و عیراق و تەنانەت نێودەوڵەتیش پڕبکەنەوە.
