په‌یامی سه‌رۆكی زانکۆی پۆلیتەکنیکی سلێمانی به بۆنه‌ی ده‌ستپێكی ساڵی نوێی خوێندن
بە ناوی سەرۆکایەتی زانکۆی پۆلیته‌كنیكی سلێمانی ، گەرمترین پیرۆزبایی و بەخێرهاتن لە خوێندکارانمان دەکەین بۆ دەستپێکردنەوەی ساڵی نوێی خوێندنی 2024-2025.
ئەمڕۆ ئێوە هەنگاوێکی گرنگتان ناوە بەرەو داهاتوویەکی پڕشنگدار و پڕ لە دەرفەت؛ زانکۆی پۆلیتەکنیکی سلێمانی شانازی بە ئێوەوە دەکات و ئامادەیە هەر لەسەرەتای دەستپێکی ساڵی نوێی خوێندنەوە هەموو توانا و سەرچاوەکانی زانستی بخاتە خزمەتی گەشەپێدانی زانست و کارامەییەکانتان.
ئێوە لە قۆناغێکی هەستیاری ژیانتاندان، قۆناغێک کە تیایدا بناغەی داهاتووی پیشەیی و دوارۆژتان دادەڕێژن. لێرەدا وه‌ك زانكۆ، ئێمە پابەندین بە پێشکەشکردنی باشترین و نوێترین زانیاری و شارەزایی لە بوارە جۆراوجۆرەکانی تەکنۆلۆژیا و زانستدا؛ ئامانجی ئێمە تەنها پێدانی بڕوانامە نییە، بەڵکو ئامادەکردنی نەوەیەکە توانای ڕووبەڕووبوونەوەی ئاڵنگارییەکانی داهاتووتان هەبێت.
خوێندکارانی خۆشەویست؛ بازاڕی کار بە خێراییەکی زۆر لە گۆڕاندایە و پێویستی بە کەسانی خاوەن بیری داهێنەرانە و توانای چارەسەرکردنی کێشە ئاڵۆزەکان هەیە. ئێمە لێرە لە زانکۆی پۆلیتەکنیکی سلێمانی، ئەو ژینگەیەتان بۆ دەڕەخسێنین کە تیایدا نەک تەنها فێری وانە تیۆرییەکان دەبن، بەڵکو دەتوانن لەسەردەستی ستافی ئەکادیمی زانکۆمان ئەو زانیارییانە لە پراکتیکدا جێبەجێ بکەن و لە ژیانی پیشەییتان جێبەجێی بکەن، چونكه زانکۆکەمان ناوبانگی دیاری لەسەر ئاستی کوردستان و عیراق هەیە بە پێشکەشکردنی خوێندنێکی پێشکەوتوو و پراکتیکی لە سەرجەم ئەو پسپۆریانەی دەخوێنرێت.ئه‌ویش به تاقیگە پێشکەوتووەکانمان، دەرفەتەکانی ڕاهێنان، بۆ ئەوەن کە ئێوە ئامادە بکەن بۆ سەرکەوتن لە دنیای ڕاستەقینەدا.
ئێمە شانازی دەکەین بەوەی کە دەرچووانی زانکۆکەمان لە نێوان داواکراوترین کەسانن لە بازاڕی کاردا. کۆمپانیا گەورەکانی ناوخۆ و نێودەوڵەتی بەردەوام بە شوێن بەهرەکانی ئێوەدا دەگەڕێن. زۆربەی خوێندکارانمان تەنانەت پێش تەواوکردنی خوێندن، پێشنیازی کار وەردەگرن. ئەمەش بەڵگەیە لەسەر ئاست بەرزی خوێندن و ڕاهێنان لە زانکۆکەمان.
هەروەها، ئێمە هانی بیرۆکە نوێکان و داهێنان دەدەین. زۆر لە خوێندکارە پێشووەکانمان توانیویانە ببنه خاوه‌ن كاری خۆیان به شێوه‌یه‌كی سەرکەوتوو. ئێمە باوەڕمان وایە کە هەر یەک لە ئێوە خاوەنی توانایەکی بێسنوورە بۆ داهێنان و گۆڕینی جیهان بە شێوەیەکی باشتر.
لە کۆتاییدا، پێتان دەڵێن: متمانەتان بە خۆتان هەبێت. ئێوە بەهرەمەندن و تواناتان هەیە كوردستان به‌ره‌و پێش به‌رن. ئێمە لێرەین بۆ ئەوەی هاوكارتان بین و پشتگیریتان بکەین لە هەر هەنگاوێکدا. با ئەم ساڵە بکەینە ساڵێکی پڕ لە سەرکەوتن، فێربوون و گەشەکردن. داهاتوو چاوەڕێی ئێوەیە، خوێندکارانی ئازیز. بە یەکەوە، دەتوانین شتی مەزن بەدی بهێنین.
بە هیوای ساڵێکی خوێندنی پڕ لە دەستکەوت و سەرکەوتن بۆ هەمووتان!
پ.د.هوشیار عەبدوڵڵا عەزیز
سەرۆكی زانكۆی پۆلیتەكنیكی سلێمانی
