زانکۆی پۆلیتەکنیکی سلێمانی بەشداری کۆنفرانسی یونسکۆ دەکات سەبارەت بە ڕۆڵی دڵنیایی جۆریی لە بەهێزکردنی خوێندنی پیشەیی

ڕۆژی دووشەممە، 20ی ئایاری 2024، د. بەختیار ابراهیم سعید، مامۆستا لە کۆلێجی تەکنیکی ئینفۆرماتیک و لێپرسراوی بۆردی دڵنیایی جۆری بۆ پرۆگرامی TVET 2  لە زانکۆی پۆلیتەکنیکی سلێمانی وەک نوێنەری زانکۆ بەشداریی لە کۆنفرانسێکدا کرد بەناونیشانی “ڕۆڵی دڵنیایی جۆریی لە بەهێزکردنی خوێندنی پیشەیی” کە لە بەغداد بەڕێوەچوو. کۆنفرانسەکە کە لەلایەن یونسکۆوە لەچوارچێوەی پرۆگرامی چاکسازیی تەکنیکی و فێرکاری و ڕاهێنانی پیشەیی لە کوردستان و عێراق – قۆناغی دووەم (TVET2) ڕێکخرابوو، و لەلایەن یەکێتی ئەوروپاوە پاڵپشتی بۆ دابینکرابوو، نوێنەری دامەزراوە جیاوازەکانی عێراق و هەرێمی کوردستانی کۆکردبوەوە لەنێویاندا زانکۆی پۆلیتەکنیکی هەولێر و زانکۆی پۆلیتەکنیکی دهۆک.

پرۆگرامی TVET2 کە لە لایەن یونسکۆوە جێبەجێ دەکرێت، بە چڕی لەگەڵ وەزارەتی خوێندنی باڵا و پەروەردە لە عێراق و هەرێمی هەرێمی کوردستان کاردەکات بۆ ئامادەکردنی تاکە بەو زانیاری و لێهاتووییانەی کە پێویستن بۆ هێزی کار، بە ئامانجی ڕەخساندنی هەلی کارێکی بەردەوام بۆ گەنجان.

لە کۆنفرانسەکەدا تیشک خرایە سەر خستنەڕووی ئەنجام و کاریگەرییەکانی جێبەجێکردنی سیستەمی دڵنیایی جۆریی لە پڕۆژەیەکی تاقیکاریدا کە پێنج قوتابخانەی پیشەیی سەر بە وەزارەتی پەروەردە لە عێراق و هەرێمی کوردستان بەشداربوون. هەروەها کۆنفرانسەکە بنەماکانی دڵنیایی جۆریی لە خوێندنی پیشەییدا ڕوون کردەوە و گرنگی کولتوری دڵنیایی جۆریی خستەڕوو. سەرەڕای ئەوەش، ڕۆڵی خوێندنی پیشەیی دڵنیایی بەرزی لە گەشەپێدانی ئابووری و کۆمەڵایەتیدا تاووتوێکرا.