زانکۆی پۆلیتەکنیکی سلێمانی یادی ڕۆژنامەگەری کوردی لە ڕۆژنامەنوسان پیرۆز دەکات 

لە ساڵڕۆژی دەرچوونی یەکەم ڕۆژنامەی كوردی کە لەساڵی 1898ز لەلایەن بەدرخانییەکانەوە بەناوی (کوردستان) لە شاری قاهیرەی پایتەختی میسر دەرچوێنرا، سەرۆکایەتی زانکۆی پۆلیتەکنیکی سلێمانی پیرۆزبایی لە سەرجەم ڕۆژنامەنوسان دەکات و دەخوازێت ساڵ بە ساڵ ڕەوتی ئازادی بیروڕا و کاری ڕۆژنامەگەری لە هەرێمی کوردستان فراوانتر بکرێت.

لە کاتێکدا کە یادی 126 ساڵەی رۆژنامەگەری دەکرێتەوە، هەرێمی كوردستان خاوەنی دەها دەزگای میدیایی پێشکەوتووە لە بوارەكانی (بینراو و بیستراو و خوێندراو) جگە لە ڕۆژنامەی ئەلیکترۆنی کە پانتاییەکی گەورەی داگیرکردووە و کاریگەری گەورەی دروستکردووە لەسەر کۆی پرسە جیاوازەکان و فراوانکردنی ئاستی رۆشنبیری و کرانەوە بەرووی جیهاندا.

لەم یادەدا، پیرۆزبایی لە ڕۆژنامەنوسان و دەزگاکانی راگەیاندن و سەندیکا و ناوەندەکانی داکۆکی لە مافی رۆژنامەنوسان دەکەین و دوپاتی دەکەینەوە زانکۆی پۆلیتەکنیکی سلێمانی بە گرنگییەوە دەڕوانێتە بواری ڕۆژنامەگەری و ڕاگەیاندن و بەکردار کاری بۆ کردووە و بەشی تایبەتی لە هەردوو کۆلێجی تەکنیکی کارگێڕی و پەیمانگەی تەکنیکی سلێمانی کردۆتەوە و ساڵانە کادیری ڕاگەیاندنی ئەکادیمی پێشکەش بە کۆمەڵگە دەکات.

  زانکۆی پۆلیتەکنیکی سلێمانی

22ی نیسانی2024