لەزانکۆی سەڵاح الدین بڕوانامەی دکتۆرا بەخشرایە مامۆستایەکی زانکۆی پۆلیتەکنیکی سلێمانی

له‌ هۆڵی فەرهادی كۆلێژی ئادابی زانکۆی سەڵاح الدین، تاوتوێی تێزى دکتۆراى توێژەر ئەرکان رەئوف عزیز مامۆستا له‌به‌شی تەکنیکی میدیا به‌ناونیشانى (دۆخى بازاڕگەرى سیاسى لە تۆڕە کۆمەڵایەتییەکان و ڕۆڵى لە کێبرکى هەڵبژاردنى پەرلەمانى عێراقدا بە نموونە ) بەسەرکەوتویی کۆتایی پێهات، توێژەر لە بەردەم پ.ى.د.حکیم عثمان حميد ئەندام و سەرپەرشتیار، ئەندامانی تری لیژنە کە پێكهاتبوون له:‌ پ.د.ئیبراهیم سعید فتح الله سه‌رۆك لێژنه‌ ، پ.ى.د.صادق حمە غریب حمەصالح ، پ.ى.د.کاروان على قادر ، پ.ی.د.سارا محسین قادر، پ.ی.د. ظاهر حمدامین صابر،  بەرگری لە ناوەڕۆکی تێزی دکتۆراکەی کرد ، ئامانجى ئەم توێژینەوەیە زانینى دۆخ و سروشتى بازاڕگەریى سیاسییە لە تۆڕە کۆمەڵایەتییەکان، ئەو ڕۆڵەى بازاڕگەریى سیاسی دەیبینێت لە کێبرکێی هەڵبژاردنەکاندا.

دواى هەڵسەنگاندن و شیکارى بۆ ئەنجامەکان، توێژینەوەکە بە کۆمەڵێک ئەنجام گەیشتووە، كە گرنگترینیان بریتین لە؛ پارتە سیاسییەکانى هەرێمی کوردستان زیاتر لە پاڵنەرێکیان هەیە بۆ بەکارهێنانى تۆڕەکۆمەڵایەتییەکان، بە مەبەستى بازاڕگەریى سیاسی و پەیوەندیکردنى سیاسی، بەڵام زۆرترین پاڵنەریان بۆ بەکارهێنانى تۆڕە کۆمەڵایەتییەکان ئەوەیە  لەلایەن ژمارەیەکى زۆر لەخەڵکەوە بەکاردەهێنرێن . ئەنجامێکى ترى توێژینەوەکە ئەوەیە کە فەیسبووک گونجاوترین پلاتفۆرمى تۆڕەکۆمەڵایەتییەکانه‌ بۆ بازاڕگەریى سیاسی، بە پێچەوانەشەوە سناپچات بە شوێنێکى گونجاو نازانرێت بۆ بازاڕگەریى سیاسی.