بە بەشدارى زانکۆی پۆلیتەکنیکی سلێمانی، پرۆژەى (ISDEHARAK) بۆ گرنگیدان بە کەرتى کشتوکاڵ ڕاگەیەنرا

بە ئامادەبونی بەڕێزان سەرۆکی زانکۆی پۆلیتەکنیکی سلێمانی (پ.ی.د. هوشیارعبدالله عزيز) ولێپرسراوی پەیوەندییە نێودەوڵەتیەکانی زانکۆی پۆلیتەکنیکی سلێمانی( پ. ی.ئاودێر محمد احمد) لە شاری بەغداد بەشداریان لە وۆرکشۆپی دەستپێکردن و ڕاگەیاندنی پڕۆژەی (ISDEHARAK) کرد، بە بەشداری هاوبەشە سەرەکییەکانی پڕۆژەکە کە پێکهاتون لە وەزارەتی خوێندنی باڵا و توێژینەوەی زانستی و وەزارەتی کشتوکاڵ و وەزارەتی پەروەردە و وەزارەتی کار و کاروباری کۆمەڵایەتی لە هەردوو حکومەتی عێراق و هەرێمی کوردستان.
مەبەست لە ئەنجامدانی وۆرکشۆپەکە بریتی بوو لە خستنەڕوی مەبەست و ئامانجەکانی پڕۆژەکە کە تایبەتە بە پەرەپێدان و گرنگیدان بە کەرتی کشتوکاڵی لە عێراق و هەرێمی کوردستاندا، هەر لە پڕۆژەکە باس لە پلان و قۆناغەکانی جێبەجێکردنی پڕۆژەکە کرا و گفتوگۆش لەسەر ئالنگاریەکانی بەردەم پڕۆژەکە و چۆنیەتی بەرەنگاربونەوەیان و دۆزینەوەی ڕێگە چارەسەر کرا.
بە نوێنەرایەتی وەزارەتی خوێندنی باڵا و توێژینەوەی زانستی سەرۆکی دەزگاى سەرپەرشتى و دڵنیایی جۆرى(د. محمد حسین) ئەندامی لێژنەی بەڕێوەبردنی پڕۆژەی ISDEHARAK لە سەرەتای دەستپێکردنی وۆرکشۆپەکەدا وتەیەکی بە نوێنەرایەتی وەزیری خوێندنی باڵا و توێژینەوەی زانستی پێشکەشکردو پاڵپشتی وەزارەتی خوێندنی باڵای حکومەتی هەرێمی کوردستانى بۆ پڕۆژەکە ڕایگەیاند، بۆ ئەمەش وتى: لە ڕێگەی ئەم پڕۆژەیە کاردەکەین بۆ پەرەپێدانی ژینگەیەکی باشی خوێندن و پەروەردە کە گرنگی بدات بە کوالێتی و بیرکردنەوەی ڕەخنەگرانە و داهێنان و توێژینەوەو وەبەرهێنان و بە مۆدێرنکردنی دامەزراوەکانمان و باشترکردنی ژێرخان و دابینکردنی ئامیری پیشکەوتوو بۆ ناوەندەکانی خوێندن لە بواری کشتوکاڵیدا، وەزارەت و زانکۆکان هاوکار و هەماهەنگ دەبن لە پەرەپیدانی پڕۆگرامەکانی خوێندن بەشێوەیەک کە بنەما سەرەکیەکانی خوێندن و ڕاهێنانی تەکنیکی و پشەیی تیایدا ڕەنگبداتەوە و ئەو کارامەیی و لێهاتویانە دەستەبەر بکات کە هاوتەریبن لەگەڵ پێداویستی بازاری کاردا و خستنەڕوی هێزێکی کاری کارامە کە دەستەبەری گەشە ئابوری و کۆمەڵایەتییەکان بکات.
ڕۆژەی ( (Iraqi Skill Development by European Union Holistic Agriculture Recovery through Advanced Knowledge-ISDEHARAK) لەلایەن یەکێتی ئەوڕوپاوە بڕی نزیکەی (١٠) ملیۆن یۆرۆی بۆ تەرخان کراوە کە ماوەی سێ ساڵ دەخایەنێت و ئامانج لە پڕۆژەکە بریتیە لە پاڵپشتیکردنی هەوڵەکانی عێراق و هەرێمی کوردستان بۆ پەرەپێدانی سیستمی خوێندن و ڕاهێنانی تەکنیکی و پیشەیی (TVET)، کە ئەمەش گرنگیەکی زۆری هەیە بۆ بژێوی ژیانی جوتیاران و ئابوری عێراق و هەرێمی کوردستان.
پڕۆژەی (ISDEHARAK) گرنگی بە دوو لایەنی سەرەکی دەدات کە یەکەمیان پشتگیریکردنە لە شێوازە نوێ و پێشکەوتوەکانی فێرکردن لە بواری خوێندن و ڕاهێنانی تەکنیکی و پیشەیی TVET)) لە بواری کشتوکاڵدا، لە لایەکی دیکەوە ئەم پڕۆژەیە گرنگی بە بەرزکردنەوەی کارامەییە تەکنیکی و کارامەییە کەسییەکان (Soft skills) دەدات بۆ بەهێزکردنی گەنجان لە ناویاندا ژنان و کوڕان و کچان و ئاوارەبوان.