كۆلێجى ته‌كنیكى كارگێڕی یه‌كێكه له‌و سێ كۆلێجه‌ى كەمپى سه‌ره‌كى زانكۆى پۆلیته‌كنیكى سلێمانى له‌ناوچه‌ى چوارچرا له‌پارێزگاى سلێمانى. ئه‌م كۆلێجه ئه‌و به‌شانه‌ى له‌خۆگرتوه كه خوێندنه‌كانیان به‌شێوه‌یه‌كى سه‌ره‌كى له‌جۆى زانیاریى كۆمه‌ڵایه‌تییه (social science)و بوه‌ته چاوگه‌یەک بۆ ئه‌و خوێندكارانه‌ى ده‌یانه‌وێت زانسته‌كانى كارگێڕیى كار، ژمێریاریى، میدیا، په‌یوه‌ندییه گشتییه‌كان‌و بازاڕگه‌رى بخوێنن.
نامانجی كۆلێج:
پێگه‌یاندنی كادیری ته‌كنیكی پێشكه‌وتوو پسپۆڕو شاره‌زا له‌ده‌زگاكانی حكومه‌تی هه‌رێمی كوردستان بۆ سه‌رپه‌رشتی‌و به‌ره‌و پێشبردنی ره‌وره‌وه‌ی كاروانی ئاوه‌دانی له‌و پسپۆرییه نوێیانه‌ی له‌سه‌رده‌ستی مامۆستایان پێیان وتراوه‌ته‌وه تا خزمه‌تی زیاتری وڵات بكه‌ن و رێچكه‌ی پیشه‌یی خوێندنی ته‌كنیكی گه‌شه‌پێبده‌ن.
دیدگاى كۆلێج:
كۆلێجى ته‌كنیكى كارگێڕیى خوازیاره كادیرى شاره‌زاو به‌زانست گۆشكراو پێبگه‌یه‌نێت بۆ دامه‌زراوه‌كانى حكومه‌تى هه‌رێمى كوردستان له‌كایه‌كانى به‌ڕێوه‌بردن، ژمێریارى، میدیا، په‌یوه‌ندییه گشتییه‌كان‌و بازاڕگه‌رى.
مێژوو:
له‌دوای ئه‌و گۆڕانگارییه‌ی به‌سه‌ر كۆلێجه ته‌كنیكیه‌كاندا هات، به‌شه‌كانی كۆلێجی ته‌كنیكی سلێمانی به‌پێی پسپۆری به‌سه‌ر كۆلێجه نوێیه‌كاندا دابه‌شكران. به‌شه كارگێڕیی و ژمێریارییه‌كان له ژێر ناوی كۆلێجی ته‌كنیكی كارگێڕیدا له‌سالی 2013 وه‌ك كۆلێجێكی سه‌ربه‌خۆ دامه‌زرێنرا.
له ئێستادا ئه‌م كۆلێجه له‌چوار به‌ش پێكهاتووه كه ئه‌وانیش:
۱- ته‌كنیكی كارگێڕی
2-ته‌كنیكی ژمێریاری
3-ته‌كنیكی میدیا
4-په‌یوه‌ندییه گشتییه‌كان و بازارگه‌ڕی
له‌و چوارچێوه‌یه‌شدا هه‌ریه‌ك له‌به‌شه‌كانی ته‌كنیكی كارگێڕی، ته‌كنیكی ژمێریاری‌و ته‌كنیكی (میدیا) بۆ ساڵی خوێندنی (2013-2014)و، به‌شی په‌یوه‌ندییه گشتییه‌كان و بازارگه‌ڕی بۆ ساڵی خوێندنی (2016-2017) ژماره‌یه‌كی به‌رچاوی خوێندكاریان وه‌رگرت‌و توانییان ئومێدێك ببه‌خشن به‌و كه‌سانه‌ی كه‌خوازیاری خوێندن و ئاره‌زووی بنیاتنانی ئاینده‌یان بوون.
