زانكۆی پۆلیتەكنیكی سلێمانی بەشداری وۆركشۆپێكی نێودەوڵەتیی دەكات

بەدروشمی (تڤێت2: ئامادەكردنی لاوانی عیراق بۆ دەستكەوتنی كار)، ئەمڕۆ یەكشەممە 12ی حوزەیران، لە شاری هەولێر، بەئامادەبوونی ئەندامانی بۆردی دڵنیایی جۆریی زانكۆی پۆلیتەكنیكی سلێمانی و نوێنەرانی شەش زانكۆی پۆلیتەكنیك و پیشەیی تری كوردستان و عێراق، وۆركشۆپێكی نێودەوڵەتیی لەلایەن رێكخراوی یۆنێسكۆوە بەڕێوەچوو، بەمەبەستی گەشەپێدان و ریفۆرمكردن لە دڵنیایی جۆریی زانكۆ بەشداربووەكاندا. وۆركشۆپەكە، كە بەشێكە لە پڕۆگرامی ریفۆرمی خوێندنی تەكنیكی و پیشەیی لە كوردستان و عێراق- قۆناغی دووەم (TVET2) و یەکێتی ئەوروپا پاڵپشتیی دارایی دەکات، دەرفەتێكە بۆ خستنەڕوو و كاركردن لەسەر ئەو پێشكەوتنانەی لەپرۆگرامەدا بەدیهاتوون كەماوەی نزیكەی ساڵێكە بەشێوەی ئۆنلاین بەردەوامەو مەبەست لێی گەشەپێدان و بنیاتنان و دیزاینكردنی سیستمێكی گونجاو و سەردەمیانەیە بۆ دڵنیایی جۆریی زانكۆكان، بۆ پڕكردنەوەی بۆشایی نێوان بڕوانامەی بەدەستهاتوو و بازاڕی كار تا دواجار خوێندكار بتوانێت لەسایەیدا بەئاسانی لەبازاڕی كاردا، كاری بۆ بڕەخسێت و بتوانێت رۆڵی هەبێت. بڕیارە وۆركشۆپەكە دوو رۆژ بخایەنێت و هەریەك لە (د.بەختیار ئیبراهیم سەعید، پ.ی.د.هەڤاڵ محەمەد سدقی، پ.ی.د.كاروان عەلی قادر، م.تەحسین علی محەمەدو م.كارزان فاتح نامق)، وەك ئەندامانی بۆردی دڵنیایی جۆری زانكۆی پۆلیتەكنیكی سلێمانی لە پرۆگرامی ناوبراودا، ئامادەن.