بەبۆنەی یادەکانی ئەنفال شانۆیی (بەرزەخ) لە کۆلێجی تەکنیکی کەلار نمایشکرا
ئەمڕۆ یەکشەممە ١٧-٤-٢٠٢٢ بەئامادەبوونی ڕاگری کۆلێجی تەکنیکی کەلارو یاریدەدەری ڕاگرو بەرپرسی مەڵبەندی 11ی ڕێکخستنی گەرمیان و ئەندامان و کارگێرانی مەڵبەند و قایمقامی قەزای کەلار و بەڕێوەبەری گشتی شەھیدان و ئەنفالکراوانی گەرمیان و بەڕێوەبەری پۆلیسی کەلار و بەڕێوەبەری کاروباری گەشتیاری گەرمیان و ژمارەیەک لە هونەرمەند و نوسەران، شانۆییەکی تایبەت بە ئەنفال بەناونیشانی (بەرزەخ) لە گۆرەپانی کۆلێج نمایشکرا .
لە شانۆگەرییەکدا دوو ئەکتەر رۆلی دوو کەسایەتی ئەنفالکراویان گێڕا کە ئەنفال هەموو هیوا و ئاواتەکانی خستۆتەژێر گۆڕ، هەردوو ئەکتەر نمونەی دوو پەپولەی بێتاوانبوون و بەدەستی جەلادە بێبەزەییەکان خرانە ناو گۆڕ و هەموو ئاواتەکانیان لە تاریکیدا جێما، کە ئەنفال پەڵەیەکی رەشە بەڕووی دوژمنانەوە و زامێکی قوڵە لە جەستەی هەمووماندا و هەرگیز لەیاد ناکرێت.
شایەنی باسە شانۆیەکە بەهاوکاری مەڵبەندی 11ی ڕێکخستنی گەرمیان ڕێکخرابوو:
بەسەرپەرشتی :هەیفا مجید
لە نوسینی: دکتۆر دڵشاد مستەفا
دەرهێنانی :رزگار فقێ محمد
نواندن: گەرمیان محمد – لیزا بەختیار
This shortcode LP Profile only use on the page Profile
