بەهاوکاری زانکۆی پۆلیتەکنیکی سلێمانی درەختی ڕزگاربووانی چەکی ناوەکی لە شاری ھەڵەبجە دەچێنرێت

لە چوارچێوەی پڕۆژەی درەختی ڕزگاربووانی چەکی ناوەکی ، کە بڕیارە لە پارێزگای ھەڵەبجە جێبەجێ بکرێت و لەلایەن ڕێکخراوی شارەوانییەکانی جیهان بۆ ئاشتی بە ھاوکاری کۆلێجی تەکنیکی زانستە پراکتیکیەکانی ھەڵەبجە بەشی کارگێڕی پرۆژە کشتوکاڵیەکان ئەنجامدەدرێت. ئەمڕۆ ژمارەیەک تۆوی درەختی تایبەتی وەرگیرا کە لەلایەن شارەوانی شاری ھیرۆشیماو ناکازاکییەوە بەتایبەت بۆ پارێزگای ھەڵەبجە نێرابوون. شایەنی باسە ئەم پرۆژەیە پێکھاتووە لە چاندنی دوو جۆر درەختی تایبەت کە وەک سومبولی ڕزگاربووانی چەکی کۆکوژ لە جیھاندا ناسێنراوون لە و شارانەدا دەچێنرێن کە چەکی کۆکوژی تێدا بەکارھاتوون. لە ئێستادا تۆوەکان گەشتوونەتە شاری ھەڵەبجە و لەلایەن بەشی کارگێڕی پرۆژە کشتوکاڵیەکانی کۆلێجی زانستە پراکتیکییەکانی زانکۆی پۆلیتەکنیکی سلێمانییەوە کاری چاندن و پەروەردەکردنیان ئەنجام دەدرێت.