رێككه‌وتنامه‌یه‌كى گرنگ له‌نێوان زانكۆى پۆلیته‌كنیكى سلێمانى و ئه‌نجومه‌نى به‌ریتانى واژۆكرا
بۆ یه‌كه‌مجار له‌سه‌ر ئاستى هه‌رێمى كوردستان، ئه‌مڕۆ یه‌كشه‌ممه له بیناى سه‌راى سلێمانى رێككه‌وتننامه‌یه‌كى گرنگ له نێوان زانكۆى پۆلیته‌كنیكى سلێمانى و British Council “ئه‌نجومه‌نى به‌ریتانى” واژۆكرا، كه به‌هۆیه‌وه په‌ره به سه‌نته‌رى زمانى ئنگلیزى ده‌درێت و بڕوانامه‌ى هاوبه‌ش به فێرخواز ده‌به‌خشرێت.
نیوه‌ڕۆى ئه‌مڕۆ یه‌كشه‌ممه ده‌یڤد پاردۆ، به‌ڕێوبه‌رى بریتش كاونسل “ئه‌نجومه‌نى به‌ریتانى” له هه‌رێمى كوردستان، گه‌یشته ته‌لارى سه‌رۆكایه‌تى زانكۆى پۆلیته‌كنیكى سلێمانى و له‌لایه‌ن سه‌رۆك و یاریده‌ده‌رانى و به‌ڕێوبه‌رى سه‌نته‌رى زمانه‌وه پێشوازى لێكرا.
دواى گفتوگۆیه‌كى ئه‌كادیمى كورت، د. ئالان فه‌ره‌یدون سه‌رۆكى زانكۆى پۆلیته‌كنیكى سلێمانى به یاوه‌رى یاریده‌ده‌ره‌كانى و به‌ڕێوبه‌رى سه‌نته‌رى زمانى ئینگلیزى سه‌رجه‌م به‌شه‌كانى سه‌نته‌رى زمانى ئینگلیزییان به ده‌یڤد پاردۆ ئاشنا كرد و ئه‌ویش خۆشحاڵى خۆى بۆ كاره‌كانى زانكۆ ده‌ربڕى.
پاشنیوه‌ڕۆى ئه‌مڕۆش له بیناى سه‌راى سلێمانى دواى كردنه‌وه‌ى پێشانگه‌یه‌كى فۆتۆگرافى خوێندكارانى كۆلێژى ته‌كنیكى میدیاى زانكۆى پۆلیته‌كنیكى سلێمانى و ناساندنى وێنه‌كان به پاردۆ، رێككه‌وتننامه‌یه‌كى گرنگ له نێوان زانكۆى پۆلیته‌كنیكى سلێمانى British Council “ئه‌نجومه‌نى به‌ریتانى” واژۆ كرا.
له‌دواى واژۆكردنى رێككه‌وتننامه‌كه‌ش له كۆنگره‌یه‌كى رۆژنامه‌وانیدا، د. ئالان فه‌ره‌یدون سه‌رۆكى زانكۆى پۆلیته‌كنیكى سلێمانى، به میدیاكانى رایگه‌یاند: “British Council “ئه‌نجومه‌نى به‌ریتانى” كه زیاتر له 100 وڵات سه‌نته‌رى هه‌یه و كارده‌كات، رێكخراوێكى جیهانى به‌ریتانییه و كارده‌كات بۆ لایه‌نى رۆشنبیریى و كۆمه‌ڵایه‌تى و زمانى ئینگلیزى”.
وتیشى: “ئێمه وه‌كو زانكۆكه‌مان بۆ به جیهانى بوونى زانكۆكه‌مان كارده‌كه‌ین، بۆئه‌وه‌ى په‌یوه‌ندییه‌كى به‌هێزمان هه‌بێت، به‌هۆى واژۆكردنى ئه‌م رێككه‌وتننامه‌یه‌شمانه‌وه سه‌نته‌رى زمانى ئینگلیزیش ده‌توانێت له‌مڕۆوه تێستى زمانى ئینگلیزى ئه‌نجومه‌نى به‌ریتانى ئه‌نجام بدات”.
ئاماژه‌ى به‌وه‌شدا: “بۆ یه‌كه‌مجاره له عیراق-دا زانكۆى پۆلیته‌كنیكى سلێمانى ئه‌و تایبه‌تمه‌ندییه‌ى خۆى ده‌بێت له سه‌نته‌رى زمانى ئینگلیزى و هه‌روه‌ها له سه‌ره‌تاى ساڵى داهاتوو كارده‌كه‌ین، بۆئه‌وه‌ى تاقیكردنه‌وه‌ى زمانى ئینگلیزى (IELTS) ئه‌نجام بدرێت، ئه‌مه جگه‌له‌وه‌ى ئۆفیس بۆ ئه‌نجومه‌نى به‌ریتانى له‌ناو زانكۆكه‌مان دابین ده‌كه‌ین له‌گه‌ل سه‌نته‌رى زمانى ئینگلیزى”.
د. ئالان فه‌ره‌یدون باسى له‌وه‌شكرد: “ئێمه باوه‌ڕمان وایه ده‌بێت زانكۆ میمبه‌رێكى كۆمه‌ڵایه‌تى و رۆشنبیریى و زانستى و ئه‌كادیمى بێت، ئه‌م رێككه‌وتنامه‌یه هه‌لێك ده‌دات به خوێندكاران و مامۆستایان و ئه‌و كه‌سانه‌ش كه خوازیارى فێربوونى زمانى ئینگلیزین به شێوازێكى ستاندارد، جگه‌له‌وه‌ش بڕوانامه‌كانمان به هاوبه‌شى له‌گه‌ل ئه‌نجومه‌نى به‌ریتانى ده‌به‌خشین به فێرخوازه‌كان”.
ته‌ئكیدیشى كرده‌وه، كه “ئه‌و كه‌سانه‌ى كه خوازیارن خولى زمانى ئینگلیزى له زانكۆكه‌مان ببینن، لیڤڵه‌كانیان بۆ دیارى ده‌كرێت و تاقى ده‌كرێنه‌وه، دواى ئه‌وه‌ى له خوله‌كه‌ش وه‌رده‌گیرێن دووباره تاقى ده‌كرێنه‌وه به‌سه‌رپه‌رشتى ئه‌نجومه‌نى به‌ریتانى و دواتر بڕونامه‌ى هاوبه‌شى زانكۆى پۆلیته‌كنیكى سلێمانى وه‌ك زانكۆىه‌كى حكومى و British Council ده‌به‌خشرێت به فێرخواز”.
جه‌ختیشى كرده‌وه: “واژۆكردنى رێككه‌وتننامه‌یه به پشتیوانى و سه‌رپه‌رشتى وه‌زاره‌تى خوێندنى باڵا و توێژینه‌وه‌ى حكومه‌تى هه‌رێم ئه‌نجامدراوه”.
هه‌ر له كۆنگره رۆژنامه‌وانییه‌كه‌دا، ده‌یڤد پاردۆ، به‌ڕێوبه‌رى British Council “ئه‌نجومه‌نى به‌ریتانى” له هه‌رێمى كوردستان، وتى: “من زۆر خۆم به خۆشحال ده‌زانم و به رۆژێكى زۆر مێژوویى سه‌یرى ده‌كه‌م، چونكه من رێككه‌وتننامه‌یه‌كى British Council-م له‌گه‌ل زانكۆى پۆلیته‌كنیكى سلێمانى واژۆكرد، كه زانكۆیه‌كى حكومیه”.
وتیشى: “ئه‌مه سه‌ره‌تایه‌كى زۆر گرنگه، چونكه زانكۆى پۆلیته‌كنیكى سلێمانى ده‌بێته یه‌كه‌م زانكۆى حكومى له سه‌رتاسه‌رى هه‌رێمى كوردستاندا، كه بتوانێت رێككه‌وتنامه له‌گه‌ل بBritish Council واژۆ بكات، رێككه‌وتننامه‌كه‌ش تایبه‌ت ده‌بێت به دابینكردنى سنته‌رى زمانى زانكۆى پۆلیته‌كنیكى سلێمانى، به‌و تێستانه‌ى له‌لایه‌ن ئه‌نجومه‌نى به‌ریتانییه‌وه بۆى كراوه”.
ئاماژه‌ى بۆ ئه‌وه‌شكرد: “هیوادارم ئه‌مه ده‌رفه‌تێك بێت كه زانكۆكانى تریش به هه‌مان هه‌نگاوى زانكۆى پۆلیته‌كنیكى سلێمانیدا بڕۆن، بۆئه‌وه‌ى ئه‌مه سه‌ره‌تایه‌ك بێت كه رێككه‌وتننامه‌ى دیكه‌ى له‌گه‌ل زانكۆكانى تریش لێبكه‌وێته‌وه”.
به‌ڕێوبه‌رى British Council “ئه‌نجومه‌نى به‌ریتانى” له هه‌رێمى كوردستان، جه‌ختیشى كرده‌وه، كه “زمان ناوه‌ندێكى زۆر گرنگه، بۆئه‌وه‌ى له رووى كلتوریشه‌وه نه‌ته‌وه‌كان به‌یه‌كه‌وه ببه‌ستێته‌وه، ئێمه له‌ڕێى ئه‌م رێككه‌وتننامه‌یه‌وه هیوادارین بتوانین گه‌نجه‌كانى ئه‌م وڵاته له رێى فێربوونى زمانى ئینگلیزى و خزمه‌تگوزارییه‌كانییه‌وه ئاشنا بكه‌ین به كلتورى به‌ریتانیا”.
