سەرۆکی زانکۆی پۆلیتەکنیکی سلێمانی بۆ مامۆستایانی زانکۆ: خزمەتی زیاتر بە خوێندکاران و پرۆسەی خوێندن بکەن

بەمەبەستی ئاگاداربوون لە جێبەجێکردنی بەرنامە و رێنماییەکانی ئەمساڵی خوێندن و گوێگرتن لە سەرنج و داواکارییەکانیان، سەرۆکی زانکۆی پۆلیتەکنیکی سلێمانی لەگەڵ راگر و سەرۆک بەش و لێپرسراوانی هۆبەکان و فەرمانبەران و مامۆستایانی کۆلێجی تەکنیکی زانستە پراکتیکییەکان و پەیمانگای تەکنیکی هەڵەبجە کۆبوویەوە. لە چوارچێوەی کردنەوەی سەنتەری توێژینەوەی هەڵەبجە بۆ دیراساتی پاشماوه‌ی به‌كارهێنانی چه‌كی كیمیایی، پ.د.ئالان فەرەیدون عەلی ئەمین سەرۆکی زانکۆی پۆلیتەکنیکی سلێمانی بەیاوەری پ.د.سۆران ئەبوبەکر یاریدەدەەی سەرۆکی زانکۆ بۆ کاروباری زانستی، سەردانی کۆلێجی تەکنیکی زانستە پراکتیکییەکان و پەیمانگای تەکنیکی هەڵەبجەی کرد و لەلایەن پ.ی.د.کارزان عەبدوڵا راگری پەیمانگا و یاریدەدەری راگر و سەرۆک بەشەکان و مامۆستایان و فەرمانبەرانەوە پێشوازی لێکرا، پاشان لە کۆبوونەوەیەکدا سەرۆکی زانکۆ دەستخۆشی لە راگر و مامۆستایان و فەرمانبەرانی کۆلێج و پەیمانگای تەکنیکی هەڵەبجە کرد کە سەرەڕای گرفت و قەیرانی دارایی بەوپەڕی دڵسۆزییەوە کارەکانیان راپەڕندووە و ئامادەکارییەکانیان بۆ دەستپێکردنی پرۆسەی خوێندن لە پەیمانگاکەدا جێبەجێکردووە. لە کۆبوونەوەکەدا سەرۆکی زانکۆ ئەوەشی خستەڕوو کردنەوەی سەنتەری توێژینەوەی هەڵەبجە بۆ دیراساتی پاشماوه‌ی به‌كارهێنانی چه‌كی كیمیایی دەکەنە بناغەی دامەزراندنی زانکۆی پۆلیتەکنیکی هەڵەبجە و کردنەوەی خوێندنی دکتۆرا و ماستەر لە ناوچەکەدا، وتیشی: بەجۆرێک لەئێستادا زەمینەیەکی زیندو و لەبارمان رەخساندووە لەڕووی پێداویستی لۆجستی و مرۆییەوە تاکو بتوانین ئەو هەنگاوی گەورەتر بنێین بۆ پارێزگای هەڵەبجە. سەرۆک بەش و لێپرسراوانی هۆبەکان و فەرمانبەران و مامۆستایانی کۆلێجی تەکنیکی و پەیمانگای تەکنیکی هەڵەبجە خۆشحاڵیان بە هەنگاوەکانی زانکۆکەیان لە ناوچەکەدا دەربڕی و ئامادەیی هەموو هاوکاری و پشتیوانییەکیان بۆ سەرخستنی پرۆژە زانستییەکانی زانکۆی پۆلیتەکنیکی سلێمانی دەربڕی، هەروەها سەرنج و پێشنیارەکانیان لەبارەی کەموکورتییەکان و پێشخستنی پرۆسەی خوێندن لە کۆلێج و پەیمانگاکەیان پێشکەش بە سەرۆکی زانکۆ کرد.