ئه‌كادیمیای ته‌كنه‌لۆجیای زانیاری هاوبه‌شی نێوان زانكۆی پۆلیته‌كنیكی سلێمانی و كۆمپانیای هواوی كرایه‌وه
له درێژه‌ی كاروچالاكییه‌كانی هه‌فته یادی زانكۆی پۆلیته‌كنیكی سلێمانی و به‌ئامانجی په‌ره‌پێدانی تواناكانی خوێتدكاران و فراوانكردنی په‌یوه‌ندییه زانستییه‌كان و چالاككردنی ئه‌و ڕێككه‌وتنه زانستییه‌ی كه زانكۆی پۆلیته‌كنیكی سلێمانی له‌گه‌ڵ كۆمپانیای هواوی ئه‌نجامیداوه ، ئه‌كادیمیای ته‌كنه‌لۆجیای زانیاری به هاوبه‌شی هه‌ردوولا له‌كه‌مپی كۆلیجه ته‌كنیكییه‌كانی زانكۆ كرایه‌وه.
ئه‌مڕۆ چوارشه‌ممه 7 ی نیسانی 2021 به‌ئاماده‌بوونی پ.ی.د. ئالان فه‌ره‌یدون عه‌لی ئه‌مین سه‌رۆكی زانكۆی پۆلیته‌كنیكی سلێمانی و د. محمد حسین بەڕێوەبەری گشتی دەزگای دڵنیایی جۆری و متمانە بەخشین له وه‌زاره‌تی خوێندنی باڵاو توێژینه‌وه‌ی زانستی و د. رافد الخفاجی جێگری به‌ڕێوه‌به‌ری گشتی كۆمپانیای هواوی و پ.د.سۆران ابوبكر یاریده‌ده‌ری سه‌رۆكی زانكۆ بۆ كاروباری زانستی و خوێندنی باڵا و د. عطا شێخ ڕاگری كۆلێجی ته‌كنیكی ئه‌ندازیاری و د. روناك محمد عبدالله ڕاگری كۆلێجی ته‌كنیكی ئینفۆرماتیك و ژماره‌یه‌ك له‌مامۆستایان و فه‌رمانبه‌ران و خوێندكاران و له‌مه‌راسیمێكی شایسته‌دا ئه‌كادیمیای ته‌كنه‌لۆجیای زانیاری له كه‌مپی كۆلیجه ته‌كنیكییه‌كانی زانكۆی پۆلیته‌كنیكی سلێمانی كرایه‌وه .
له ووته‌یه‌كدا سه‌رۆكی زانكۆی پۆلیته‌كنیكی سلێمانی به‌خێرهاتنی ئاماده‌بووانی كرد و خۆشحاڵی خۆی ده‌ربڕی به ئه‌نجامدانی كارێكی هاوبه‌شی زانستی نێوان زانكۆو كۆمپانیایه‌كی كه‌رتی تایبه‌ت له‌پێناو به‌ره‌وپێشبردنی تواناكانی خوێندكاران و بره‌ودان به‌و زانسته‌ی كه فێرده‌كرێن ، وه پیرۆزبایی له سه‌رجه‌م مامۆستایان و خوێندكاران و فه‌رمانبه‌رانی زانكۆ كرد بۆ به‌دیهاتنی ئه‌م ده‌ستكه‌وته و هیوای خواست زیاتر په‌ره به ئه‌م ئه‌كادیمیایه بدرێت تا زۆرترین خزمه‌ت به زانست و خوێندن بكات.
باسی له‌وه‌كرد كه زانكۆی پۆلیته‌كنیكی سلێمانی هه‌میشه له‌هه‌وڵدایه بۆ به‌رزكردنه‌وه‌ی ئاستی زانستی زانكۆو ئه‌نجامدانی كاری هاوبه‌شی نێوخۆی و نێوده‌وڵه‌تی، ڕایگه‌یان خۆشحاڵین ئه‌مڕۆ له‌گه‌ڵ كۆمپانیایه‌كی نێوده‌وڵه‌تی بواری ئایتی و پویوه‌ندییه‌كان كارێكی هاوبه‌ش ده‌كه‌ین كه ڕاسته‌وخۆ خزمه‌ت به خوێندكاران و مامۆستایان و ئاستی زانستی و ئه‌كادیمیان ده‌كات به‌پێی ستانداردی نێوده‌وڵه‌تی كه بێگومان هه‌لی كاریش ده‌بێت بۆ ده‌رچووان. دوپاتی كرده‌وه زانكۆی پۆلیته‌كنیكی سلێمانی هه‌میشه كاری بۆ خزمه‌تی خوێندكاران و مامۆستایان و فه‌رمانبه‌ران به‌تایبه‌تی و كۆمه‌ڵگا به‌گشتی كردوه‌و له‌پار ساڵدا سه‌نته‌رێكمان دروستكرد به‌ناوی سه‌نته‌ری خزمه‌تی كۆمه‌ڵگا كه تایبه‌ته به دراسه‌كردن و پڕكردنه‌وه‌ی پێداویستییه‌كانی كۆمه‌ڵگا.
پ.ی.د. ئالان فه‌ره‌یدون عه‌لی ئه‌مین سه‌رۆكی زانكۆی پۆلیته‌كنیكی سلێمانی له درێژه‌ی ووته‌كه‌یدا ئاماژه‌ی دا به‌وه‌ی كه دامه‌زراندنی ئه‌م ئه‌كادیمیایه ده‌بێته ئه‌كادیمیای ئاماده‌كردنی كادری ته‌كنیكی پسپۆر له‌كه‌رتی گشتی و تایبه‌ت كه‌له‌سه‌ر ئاستی هه‌رێمی كوردستان ته‌نها دوو ئه‌كادیمیا هه‌یه كه ئه‌مه یه‌كێكیانه.
له‌كۆتاییدا سوپاسی خۆی گه‌یانده كۆمپانیای هواوی بۆ هاوكاری و هاوبه‌شیان له‌م كاره‌دا و سوپاسی هه‌ریه‌كه له كۆلیجی ته‌كنیكی ئه‌ندازیاری و ئینفۆرماتیكی زانكۆو به‌ڕێوه‌به‌رایه‌تی گه‌شه‌پێدانی تواناكان بۆ هه‌لی كار CDC كرد بۆ هه‌وڵ و ماندوبونیان و هه‌روه‌ها یاریده‌ده‌ری سه‌رۆكی زانكۆ بۆ كاروباری زانستی و هه‌موو ئه‌وانه‌ی ده‌ستیان له بونیادنانی ئه‌م ئه‌كادیمیایه هه‌بووه.
پاشان له‌وته‌یه‌كدا د.محمد حسین بەڕێوەبەری گشتی دەزگای دڵنیایی جۆری و متمانە بەخشین له وه‌زاره‌تی خوێندنی باڵاو توێژینه‌وه‌ی زانستی پیرۆزبایی و ده‌ستخۆشی خۆی ئاراسته‌ی زانكۆی پۆلیته‌كنیكی سلێمانی و كۆمپانیای هواوی كرد بۆ ئه‌و كاره چونكه هه‌ماهه‌نگی نیوان زانكۆكان و كه‌رتی تایبه‌ت گرنگی خۆی هه‌یه‌و خزمه‌تێكی گه‌وره به خوێندكاران و مامۆستایان ده‌كات.
د. رافد الخفاجی جێگری به‌ڕێوه‌به‌ری گشتی كۆمپانیای هواوی ووته‌یه‌كی پێشكه‌شكردو پیرۆزبایی كردنه‌وه‌ی ئه‌كادیمیاكه‌ی له ئاماده‌بوان كرد و دوپاتی كرده‌وه كه كۆمپانیاكه‌یان هه‌میشه ئاماده‌یی تیادایه بۆ خزمه‌تگه‌یاندن به‌بواری ته‌كنه‌لۆجیای زانیاری و په‌یوه‌ندییه‌كان له زانكۆكانی كوردستان و زانكۆی پۆلیته‌كنیكی سلێمانیشمان به گونجاو زانی تا ئه‌م ئه‌كادیمیایه‌ی تیادا بكه‌ینه‌وه‌و تواناكانی خۆمان له‌گه‌ڵ ئه‌و زانكۆیه به‌ش بكه‌ین.
له‌كۆتاییدا ئاماده‌بووانی مه‌راسیمه‌كه به‌فه‌رمی ئه‌كادیمیاكه‌یان كرده‌وه‌و به‌شه‌كانیان به‌سه‌ر كرده‌وه.
This shortcode LP Profile only use on the page Profile
