كۆبونه‌وه‌یه‌كی گرنگ له‌نێوان ژماره‌یه‌ك سه‌رۆك زانكۆی هه‌رێمی كوردستان له‌گه‌ڵ لیژنه‌ی په‌روه‌رده‌و خوێندنی باڵای په‌ڕله‌مانی عێراق به‌ڕێوه‌چوو
به‌مه‌به‌ستی ئاڵوگۆڕی بیروڕاكان و گه‌یاندنی كێشه هه‌نوكه‌ییه‌كان به لیژنه‌ی په‌روه‌رده‌و خوێندنی باڵای په‌ڕله‌مانی عێراق، كۆبونه‌وه‌یه‌كی گرنگ له‌نێوان ژماره‌یه‌ك سه‌رۆكی زانكۆكانی سنوری پارێزگای سلێمانی و هه‌ڵه‌بجه‌و گه‌رمیان له‌گه‌ڵ سه‌رۆك و ئه‌ندامانی لیژنه‌ی په‌روه‌رده‌و خوێندنی باڵا به‌ڕێوه‌چوو.
ئه‌مڕۆ چوارشه‌ممه 4 ی تشرینی دووه‌می 2020 سه‌رۆكی زانكۆكانی ( پۆلیته‌كنیكی سلێمانی ، سلێمانی، هه‌ڵه‌بجه، گه‌رمیان،چه‌رموو، كۆمار،جیهان) له‌گه‌ڵ د. مفدام الجمیلی- سەرۆكی لیژنەی پەروەردەو خوێندنی باڵا لە ئەنجومەنی نوێنەرانی عیراق، و تەها حەمەد، بڕیاردەری لیژنەكەو مامۆستا مەریوان نادر كۆبونه‌وه‌و چه‌ند ته‌وه‌رێكی گرنگ له‌سه‌ر خوێندنی باڵا گفتوگۆی له‌باره‌وه كرا.
له‌كۆبوونەوەكەدا كه له‌زانكۆی سلێمانی به‌ڕێوه‌چوو باس لە بەستنی كۆنفرانسێكی زانستی گەورە كرا لە شاری سلێمانی بۆ سەرجەم زانكۆكانی عێراق بەمەبەستی پتەوكردنی پەیوەندییە زانستی و ئەكادیمییەكانی نێوان زانكۆكانی هەرێمی كوردستان و زانكۆكانی عیراق.
