لە سیمینارێكدا وردەكاری یاسای چاكسازیی خرایەڕوو

لەسەر بڕیاری سەرۆكی زانكۆی پۆلیتەكنیكی سلێمانی، لە سەرۆكایەتی زانكۆ سیمینارێك بەمەبەستی شیكردنەوەی وردەكاری یاسای چاكسازیی بەڕێوەچوو. كاتژمێر 10ی بەیانی رۆژی یەكشەممە 2020/7/19 لە هۆڵی پیرەمێردی سەرۆكایەتی زانكۆی پۆلیتەكنیكی سلێمانی بەئامادەبوونی پ.ی.د.دانا ئەحمەد یاریدەدەری سەرۆكی زانكۆ بۆ كاروباری كارگێڕی و دارایی و بەڕێوەبەران و فەرمانبەرانی كارگێڕی و دارایی و یاسایی زانكۆ، سیمینارێك بۆ پ.ی.د.جەلال عەبدوڵا لەلایەن لیژنەی باڵای زانكۆوە بۆ پێدانی روونكردنەوە و زانیاری لەسەر یاسای چاكسازیی ئەنجامدرا. لە سمینارەكەدا پ.ی.د.جەلال عەبدوڵا وردەكاری یاسای چاكسازیی كە لەلایەن حكومەتی هەرێمەوە دەرچووە بۆ ئامادەبووان خستەڕوو، هەروەها باسی لە هەنگاوەكانی جێبەجێكردنی یاساكە كرد كە پێویستە لە سەرەتادا چۆن ئامادەكاری و كارئاسانی بۆ پرۆسەكە بكرێت تا بەشێوەیەكی خێرا و دروست ئەنجام بدرێت. لە چوارچێوەی پابەندبوون و جێبەجێكردنی رێنماییەكانی تەندروستی سەبارەت بە ڤایرۆسی كۆرۆنا بڕیاردرا فەرمانبەرانی كۆلێج و پەیمانگەكانی دەرەوەی پارێزگای سلێمانی سەر بە زانكۆی پۆلیتەكنیكی سلێمانی بەشێوەی ئۆنلاین بەشداری لە سیمینارەكەدا بكەن و سەرنج و پرسیارەكانی لەبارەی پرۆسەكەوە بخەنەڕوو.