خوێندكارێكی كۆلێجی تەكنیكی تەندروستی بەرهەمێكی زانستی بەپێز بڵاودەكاتەوە

لە هەوڵدانێكی زانستی بەپێزدا خوێندكار (بەشیر محەمەد رەسوڵ) خوێندكاری كۆلێجی تەكنیكی تەندروستی سەر بە زانكۆی پۆلیتەكنیكی سلێمانی، كتێبێكی زانستی پڕ زانیاریی پزیشكی و تەندروستی بەناوی (فریاگوزاری سەرەتایی First Aid) خستۆتە بەر دیدی خوێنەران. ئەمەش دەستكەوتێكی زانستییە كە لەلایەن خوێندكارێكی زانکۆوە بێتە بەرهەم، لایخۆشیەوە (بەشیر محەمەد) تایبەت بە سایتی زانکۆ راگەیاند: كە ماوەی ساڵێکە سەرقاڵی كۆكردنەوەی زانیاری دروستن بۆ ئەوەی بتوانن لە دوو توێی كتێبێكدا بیخەنە بەر دیدەی خوێنەران، ئەمەش لەپێناو خزمەتكردن و گەیاندنی زانیاریی بە خوازیاران و خولیایانی بواری زانست، وتیشی: بە پێویستمان زانی كە لەگەڵ هاوڕێیەكمدا ئەو هەلە بقۆزینەوەو بتوانین پێكەوە ئەم بەرهەمە پێشكەش بە هاونیشتمانیانمان بكەین، بەو هیوایەی توانیبێتمان سوودێكمان گەیاندبێت بە خەرمانی زانستی پزیشكی و بەرهەمێكمان بۆ بواری تەندروستی كتێبخانەی كوردی زیادكربێت لە هەرێمی كوردستاندا. لای خۆشیانەوە سەرۆکایەتی زانکۆ و راگرایەتی كۆلێج دەستخۆشی لەو خوێندكارە نمونەییە دەكەن و هیوادارن نمونەیان زۆر بێت، وەک هەمیشەش پشتیوانیان دەبن بۆ خزمەت گەیاندن بە رەوشی تەندروستی لە هەرێمەكەماندا.