سەرۆكی زانكۆی پۆلیتەكنیكی سلێمانی بانگەوازێک ئاراستەی زانکۆکان و ئەکادیمیان وخێرخوازان دەكات

گروپی ئەکادیمیانی خۆبەخش (کە لەلایەن سەرۆکی زانکۆی پۆلیتەکنیکی سلێمانی)یەوە سەرپەرشتی دەکرێت، بانگەوازێک ئاراستەی سەرجەم ئەکادیمیان و مامۆستایان و فەرمانبەرانی زانکۆکانی کوردستان، زانکۆ حکومی و ئەهلییەکان دەکات و داوادەکات، لەم قۆناغە هەستیارەی ژیانی کۆمەڵانی خەڵکی کوردستاندا، با هەموومان دەست لەناو دەست و بە بەخشینەکانمان، سکی برسی منداڵانی ماڵە هەژارێک تێربکەین و دەستگیرۆیی ئەو کەسانە بکەین کە بەهۆی پابەندبونیان بەرێنماییە تەندروستییەکان و خۆپارێزییان لەڤایرۆسی کۆرۆنا ناتوانن بژێوی ژیانی رۆژانەیان دابین بکەن. وەرن پێکەوە هەماهەنگبین و ببین بەهۆی ئەوەی هەژارەکان و کەسوکارە کەم دەرامەتەکانمان لە ماڵەکانیان نەیەنە دەرەوەو ترسی بژیوی ژیانیشیان نەبێت. ئەکادیمیانی بەڕێز مامۆستایان و فەرمانبەرانی زانکۆکانی کوردستان دەتوانن بەپەیوەندی کردنتان بەژمارە تەلەفونەکانی (٠٧٧٣٦٩٨٨٩٩٨ – ٠٧٧٠٧٧٧٠٤٠٤) بەشداری بکەن لە دابین کردنی کارتۆنێک پێداویستی رۆژانەو خواردن و وشکەی ماڵە هەژارێک. سەرپەرشتیارانی گروپ هەر ئەمڕۆ دەستیان کرد بە دابەشکردنی ١٢٥ کارتۆن بەسەر ماڵی هەژاراندا و لەو چوارچێوەیەشداو بۆ پەیڕەوکردنی رێنماییە تەندروستییەکان، هاوکارییەکان یەک یەک بەسەر ماڵەکاندا دابەشدەکرێت و بەهیچ جۆرێک قەرەباڵخی و کۆبونەوە دوستناکرێت و شوێن و ناو و کەسایەتی ماڵەکانیش دەپارێزرێت کە هاوکارییەکەیان پێدەگەیەندرێت. ئەو بڕەی دەیبەخشیت بۆ ژیانی تۆ کەمە، بەڵام لەبەرامبەردا، رەزامەندی خواو دوعای گیرای ماڵەهەژارێک بەدەستدەهێنیت و سکی برسی مرۆڤێک تێردەکەیت.