كۆبونەوەی ئاسایی ئەنجومەنی زانكۆ لەڕێگەی ئۆنلاینەوە بەڕێوەچوو
بەمەبەستی هەڵسەندگاندنی ئەو دۆخە نەخوازراوەی ڕووی كردۆتە هەرێمی كوردستان و ناوچەكەو دونیا بەتایبەتی ڕاگرتنی پرۆسەی خوێندن لە زانكۆو پەیمانگاكاندا بەهۆی بڵاوبونەوەی ڤایرۆسی كۆرۆنا، بەسەرپەرشتی پ.ی.د. ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی، بەئامادەبوونی یاریدەدەرانی سەرۆكی زانكۆو و سەرجەم ڕاگری كۆلیج و پەیمانگاكان بەهۆی سیستمی ئەلیكترۆنی زانكۆو ڕێگەی ئۆنلاینەوە كۆبونەوەی ئاسایی ژمارە 10 ی ئەنجومەنی زانكۆ بەڕێوەچوو.
لەكۆبونەوەكەدا سەرۆكی زانكۆی پۆلیتەكنیكی سلێمانی باسی لە دوا پێشهات و گۆڕانكارییەكان كرد بەتایبەت لە ڕووی زانستییەوە لەسەر ڤایرۆسی كۆرۆنا و چۆنێتی تەشەنەكردنی بەشێوەیەكی چاوەڕواننەكراو، هەروەها باسی لە كاریگەرییە نێگەتیڤەكانی ڕاگرتنی پرۆسەی خوێندن كرد بەتایبەت لە زانكۆو پەیمانگاكاندا كە خوێندكاران بەشێوەیەكی بەرچاو لە خوێندن دابڕاون.
لەتەوەرێكی تردا باسی لە میكانیزمی بەڕێوەبردنی خوێندن و بەردەوام بوونی كرا بەشێوازێك كە بگونجێت لەگەڵ بارودۆخی ئێستادا، بەڕێزیان ئاماژەیان دا بەو ڕێكارو كاروچالاكییانەی كە زانكۆ لە ماوەی مانگ و نیوی ڕابردوودا بۆ هۆشیاری و خۆپارێزی لە ڤایرۆسی كۆرۆنا ئەنجامی داوەو ڕایگەیاند پێویستە بەردەوام بین.
كۆبونەوەی ئەنجومەنی زانكۆ لیژنەی بۆلۆنا سیستەمی ڕاسپارد كە كۆبونەوەی خۆیان ئەنجام بدەن بۆ دۆزینەوەی میكانیزمێكی گونجاوی چارەسەری بۆ پرۆسەی خوێندن.
ئەنجومەنی زانكۆی پۆلیتەكنیكی سلێمانی دەستخۆشی و ماندونەبوونی ئاراستەی لیژنەی ڕوبەڕوبونەوەی ڤایرۆسی كۆرۆنا لە بەڕێوەبەرایەتی تەندروستی و سەلامەتی و بەڕێوەبەرایەتی ڕاگەیاندن و چالاكییەكانی زانكۆ كرد كە لێبڕاوانە وەك سەربازی وون لەكارو ئەركدان بۆ بەخشینی زانست و زانیاری و هۆشیاری تەندروستی و خۆپارێزی لە دژی پەتای كۆرۆنا.
لەبڕیارەكانی كۆبونەوەی ئاسایی ئەنجومەنی زانكۆی پۆلیتەكنیكی سلێمانی وەك ئامادەكارییەك بۆ نەوەستاندنی پرۆسەی خوێندن و پاڵپشتی بۆ خوێندنی زانكۆی پۆلیتەكنیكی سلێمانی، لیژنەیەك ڕاسپێردرا بۆ كردنەوەی خولی ڕاهێنانی سیستمی ئۆنلاین بۆ مامۆستایان بەمەبەستی ئەنجامدانی ووتنەوەی وانەكان لە ڕۆژانی داهاتوودا بەخوێندكاران.
لەكۆتاییدا ئەنجومەنی زانكۆ دەستخۆشی لە بەڕێوەبەرایەتی ئایتی لەسەرۆكایەتی زانكۆ كرد بەمەبەستی ئامادەكاری و ئەنجامدانی كۆبونەوەكە لەڕێگەی سیستمی ئەلیكترۆنی زانكۆو لەڕێگەی ئۆنلاین google meet كە سەرجەم ئەندامانی ئەنجومەنی زانكۆ هەریەكەو لەشوێن و جێگای خۆیەوە بەشداربوون لەكۆبونەوەكەو ڕاوسەرنجی خۆیان دەربڕی.
لەكۆتایی كۆبونەوەكەدا سەرۆك و ئەندامانی ئەنجومەنی زانكۆی پۆلیتەكنیكی سلێمانی هیوایان خواست بەزووترین كات ئەم ڕەوشە نەخوازراوە كە بەهۆی بڵاوبونەوەی ڤایرۆسی كۆرۆنا هاتۆتە ئاراوە كۆتایی پێبێت، وە هیوای سەلامەتی و تەندرویستییەكی باشیان بۆ مامۆستایان و خوێندكاران و فەرمانبەرانی زانكۆو سەرجەم خەڵكی كوردستان خواست.
This shortcode LP Profile only use on the page Profile
