شاندی سەنتەرەكانی زمان سەردانی زانكۆی كامبریدج دەكەن

بەمەبەستی بینینی خولی ڕاهێنان و بەهێزكردنی سەنتەرەكانی زمان لەهەرێمی كوردستان و لەچوارچێوەی سەردانی بەڕێوەبەری سەنتەرەكانی زمان لە زانكۆ حكومییەكانی هەرێمی كوردستان بۆ ووڵاتی بەریتانیا ، ڕۆژی 6 ی شوباتی 2020 شاندەكە سەردانی زانكۆی كامبریدجیان كرد و لەلایەن بەرپرسانی زانكۆكەوە پێشوازییەكی فەرمییان لێكرا. د. هۆگر محمد تۆفیق بەڕێوەبەری سەنتەری نێودەوڵەتی زمانی ئینگلیزی لەزانكۆی پۆلیتەكنیكی سلێمانی یەكێك بوو لەبەشداربووانی شاندی زانكۆ حكومییەكان بەسەرپەرشتی وەزارەتی خوێندنی باڵاو توێژینەوەی زانستی حكومەتی هەرێمی كوردستان و لەسەر بانگهێشتی Waltham International College in London, the UK بەڕێوەدەچێت ، بەم شێوەیە لەسەر بینینی خولەكەو سەردانەكەیان بۆ ووڵاتی بەریتانیا بۆ سایتی زانكۆ ڕایگەیاند: لەدوای ئەوەی بانگهێشت كراین بۆ بینینی كۆرسێكی تایبەت بە پەرەپێدان و بەهێزكردنی توانستی سەنتەرەكانی زمان لە زانكۆ حكومییەكان و شاندەكەمان گەیشتە ووڵاتی بەریتانیاو پێشوازییەكی فەرمیمان لێكرا،  لە 1 ی شوبات 2020 كۆرسەكە دەستی پێكردوەو بڕیارە تا 8 ی شوباتی 2020 بەردەوام بێت. لەو چوارچێوەیەشدا سەردانی زانكۆی كامبریدجمان كر كە یەكێكە لەزانكۆ ناودارو كاریگەرەكانی دونیا و لەوێش ژمارەیەك سیمینار پێشكەش بە شاندەكەمان كرا لەسەر شێوازی بەڕێوەچوونی تێست و پرۆگرامەكانی سەنتەری زمان و چۆنێتی پەرەپێدانیان لەئایندەدا. هەروەها ئاڵوگۆڕی زانیاریش كرا لەنێوان هەردوولا و گفتوگۆی پێویست ئەنجام درا بەئامانجی دروستكردنی هەماهەنگی زیاتر لەنێوان ئەو زانكۆیەو سەنتەری زمانی زانكۆ حكومییەكان و بەفراوانتر لەنێوان زانكۆی كامبریدج و وەزارەتی خوێندنی باڵاو توێژینەوەی زانستی  بەئامانجی ئەوەی لەداهاتوودا بە شێوازێكی باشتر كارەكان بەڕێوەبچن و ڕاهێنان بە ستافی ئەكادیمی بكرێت . پاشان لۆگۆی هەردوو زانكۆ ئاڵوگؤر كرا كە بویە مایەی خۆشحاڵی. لەكۆتاییدا بەڕێوەبەری سەنتەری نێودەوڵەتی زمانی ئینگلیزی لەزانكۆی پۆلیتەكنیكی سلێمانی ڕایگەیاند كە بەگشتی سوودێكی باشمان لە كارو ئەزمونی چەندین ساڵەی زانكۆی كامبریدج وەرگرتوەو ئومێد دەكەین ڕێككەوتنی زانستی و هەماهەنگی زیاتری لێبكەوێتەوە .