چالاكی هۆشیاری تەندروستی لەسەر ڤایرۆسی كۆرۆنا لە فامیلی مۆڵ بەڕێوەچوو
بەڕێوەبەرایەتی تەندروستی و سەلامەتی زانكۆی پۆلیتەكنیكی سلێمانی بەهەماهەنگی لەگەڵ كۆلێجی تەكنیكی تەندروستی چالاكی هۆشیاری تەندروستی لەسەر ڤایرۆسی كۆرۆنا لە فامیلی مۆڵی شاری سلێمانی رێكخست.
لە چوارچێوەی هەڵمەتی هۆشیاری دژی نەخۆشی ڤایرۆسی كۆرۆنا، ئێوارەی چوارشەممە 2020/2/5 لە فامیلی مۆڵی شاری سلێمانی، بەڕێوەبەرایەتی تەندروستی و سەلامەتی زانكۆی پۆلیتەكنیكی سلێمانی بەهەماهەنگی لەگەڵ كۆلێجی تەكنیكی تەندروستی چالاكییەكی هۆشیاری تەندروستی لەسەر ڤایرۆسی كۆرۆنا رێكخست، چالاكییەكە لەلایەن م.عیماد مەجید بەڕێوەبەری بەڕێوەبەرایەتی تەندروستی و سەلامەتی زانكۆ سەرپەرشتی دەكرا و لەلایەن ژمارەیەك لە خوێندكارانی كۆلێجی تەكنیكی تەندروستییەوە پۆستەر و دەمامك و دەستكێش و رێنمایی تایبەت بە خۆپاراستن لە ڤایرۆسی كۆرۆنا پێشكەش بە هاوڵاتیان و گەشتیاران كرا و داوایان لێكرا بەباشی ئەو رێنماییانەی سەر پۆستەرەكان لە شوێنە گشتییەكان و تەنانەت ماڵەوە جێبەجێ بكەن تا بە دووربن لە توشبوون بەو ڤایرۆسە مەترسیدارە.
لەوبارەیەوە م.عیماد مەجید بەڕێوەبەری بەڕێوەبەرایەتی تەندروستی و سەلامەتی بۆ سایتی زانكۆمان وتی: لە سۆنگەی بەرپرسیارێتیمان وەك ناوەندێكی ئەكادیمی هەڵمەتێكی هۆشیاریمان بۆ روبەڕوبوونەوەی ڤایرۆسی كۆرۆنا دەستپێكردووە، وەك ئاشكرایە لەئێستادا ئەو ڤایرۆسە بڵاوبۆتەوە بە تایبەت لە رۆژهەڵاتی ناوەڕاستدا، ئێمەش وەك بەڕێوەبەرایەتی تەندروستی و سەلامەتی زانكۆی پۆلیتەكنیكی سلێمانی بەهەماهەنگی لەگەڵ كۆلێجی تەكنیكی تەندروستی و لە رێگەی خوێندكارانمانەوە هەستاین بە بڵاوكردنەوەی كۆمەڵێك نامیلكە و پۆستەر كە رێنمایی تەواوی تێدایە لەسەر مێژووی دروستبوونی ئەم ڤایرۆسە و نیشانەكانی و چۆنێتی خۆپاراستن لەم جۆرە ڤایرۆسە.
بەڕێوەبەری بەڕێوەبەرایەتی تەندروستی و سەلامەتی زانكۆی پۆلیتەكنیكی سلێمانی وتیشی: هەڵمەت و چالاكی دژی بڵاوبوونەوەی ڤایرۆسی كۆرۆنا درێژەی دەبێت و سبەی شەو لە ماجدی مۆڵی شاری سلێمانی چالاكی تەندروستی ئەنجام دەدەین.
This shortcode LP Profile only use on the page Profile
