كۆنفرانسی زانستی (رۆڵی ژنانی عێراقی لە پرۆسەی دروستكردنی بڕیار لە نێوان واقیع و خواست )دا بەڕێوەچوو
زانكۆی پۆلیتەكنیكی سلێمانی بەهاوبەشی لەگەڵ ( جمعية المشكاة الثقافية )ی عێراقی سێیەمین كۆنفرانسی زانستی لەژێر ناوی (رۆڵی ژنانی عێراقی لە پرۆسەی دروستكردنی بڕیار لە نێوان واقیع و خواست )دا ئەنجامدا.
ئەمڕۆ رێكەوتی 2019/7/25 بەچاودێری پ.ی.د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی و بەئامادەبوونی د.رێواس فایەق سەرۆكی پەرلەمانی كوردستان و نەرمین عوسمان وەزیری پێشتووتری كارو كاروباری كۆمەڵایەتی حكومەتی هەرێم و د.ئیمان الخفاجی سەرۆكی ( جمعية المشكاة الثقافية ) و ژمارەیەك بەرپرسی حكومی و حزبی و یاریدەدەرانی سەرۆكی زانكۆی پۆلیتەكنیكی سلێمانی و راگری كۆلێجی و پەیمانگاكانی سەر بە زانكۆ و ژمارەیەكی بەرچاو لە مامۆستایان و توێژەران و كەناڵەكانی راگەیاندن، سێیەمین كۆنفرانسی زانستی لەژێر ناوی (رۆڵی ژنانی عێراقی لە پرۆسەی دروستكردنی بڕیار لە نێوان واقیع و خواست )دا لە هۆڵی پیرەمێردی سەرۆكایەتی زانكۆ بەڕێوەچوو كە بەهاوبەشی لە نێوان سەنتەری جێندەرناسی زانكۆی پۆلیتەكنیكی سلێمانی و ( جمعية المشكاة الثقافية ) رێكخرابوو.
سەرەتای كۆنفرانسەكە بە ساتێك وەستان بۆ گیانی پاكی شەهیدان و وتەی بەخێرهاتن لەلایەن د.دڵپاك تاهیر لێپرسراوی سەنتەری جێندەرناسی زانكۆی پۆلیتەكنیكی سلێمانی دەستیپێكرد و ئاماژەی بە گرنگی تەوەری پانێلەكانی كۆنفرانسەكە كرد وتی: ئەم كۆنفرانسە پرسێكی زۆر گرنگ تاوتوێ دەكات كە ئەویش پرسی بەشداریپێكردنی ژنە لە ناوەندەكانی بڕیاردا، وتیشی: لەم كۆنفرانسەدا 11ی توێژینەوەی زانستی پێشكەش دەكرێن و سەرجەم توێژینەوەكانیش لە چوارچێوەی پرسی ژنە و باس لەو گرفت و ئاستەنگانە دەكەن كە بوونەتە رێگر لەبەردەم بەشداركردنی ژن لە ناوەندەكانی بڕیاردا.
پاشان پ.ی.د.ئالان فەرەیدون عەلی ئەمین سەرۆكی زانكۆی پۆلیتەكنیكی سلێمانی وتەیەكی پێشكەشكرد و وتی: هەمیشە دەرگای زانكۆمان كراوەیە بۆ ئەنجامدانی ئەو كارو چالاكی زانستی خزمەتكردن بە چینەكانی كۆمەڵگە بكات لەڕووی ئەكادیمی و زانستییەوە، وە لەو چوارچێوەیەشدا ژنی كورد رۆڵی كاریگەرو بەرچاویان هەبووە لە ناوەندە ئەكادیمی و زانستیەكاندا و جێ پەنجەیان بەڕووی دیارە، وە ژنان هەمیشە رۆڵیان هەبووە لەناو كۆمەڵگە و دروستكردنی بڕیار و بونیادنانی داهاتوودا.
سەرۆكی زانكۆی پۆلیتەكنیكی سلێمانی وتیشی: ئێمە وەك ناوەندێكی ئەكادیمیی لە پایتەختی رۆشنبیری هەرێمی كوردستان رۆڵی ژنان بەرزدەنرخێنین و كار بۆ هۆشیاركردنەوەی كۆمەڵگە دەكەین و پشتیوانی ئەوە دەبین ژنانیش هاوشێوەی پیاوان بەشداربن لە بڕیارە چارەنوسسازەكانی گەل و نەتەوەكەمان.
پاشان د.ئیمان الخفاجی سەرۆكی ( جمعية المشكاة الثقافية )ی عێراقی لە وتەیەكیدا رۆڵی زانكۆی پۆلیتەكنیكی سلێمانی بەرزنرخاند لە كاری هاوبەشی زانستی و زۆر سوپاسی زانكۆی كرد كە خەمخۆرانە لەپاڵ بەرەوپێشبردنی پرۆسەی خوێندن و تەكنیكی كار بۆ هۆشیاركردنەوەی كۆمەڵگە و رەخساندنی ژینگەیەكی گونجاو بۆ چین و توێژەكانی دیكەی كۆمەڵگە دەكات.
دواتر پانێلەكانی كۆنفرانسەكە و پێشكەشكردنی توێژینەوەكان دەستیپێكرد كە دوو پانێلی سەرەكی لەخۆگرتبوو لە پانێلی یەكەمدا ( د.رێواس فایەق ) سەرۆكی پەرلەمانی كوردستان بەوری باسی لە مێژوو و ئەزمونەكانی ژیانی خۆی كرد كە چۆن لە سەرەتاوە دەستپێكردووە و تا گەیشتۆتە ئەم ئاستە باڵایەی ئێستا كە بە چەندین لەمپەر و بەربەستی سەخت و ناخۆشدا تێپەڕێوە، لە پانێلی دووەمدا ( نەرمین عوسمان ) ئەندامی سەركردایەتی ی.ن.ك و ( ئەمەل جەلال ) بەڕێوەبەری گشتی ئەنجومەنی ژنان لە هەرێمی كوردستان و (د.ئیمان الخفاجی) سەرۆكی ( جمعیە المشكاە الپقافیە )ی عێراقی چەندین بابەتیان سەبارەت بە رۆڵی ژنان لە پرۆسەی دروستكردنی بڕیار لە نێوان واقیع و خواستدا خستەڕوو كە لەلایەن ئامادەبووانی كۆنفراسەكەوە چەندین سەرنج و پێشنیار و پرسیار ئاڕاستەی بەشداربووانی پانێلەكە كران.
لە بەشێكی دیكەی كۆنفرانسەكەدا و جیاواز لە كۆنفرانسەكانی دیكە كۆمەڵێك كاری دەستی ژنان و تابلۆ و جلوبەرگی رەسەنی كوردی و عیراقی نمایشكران و بوونە جێگەی سەرنجی ئامادەبووان و دروستكردنی كەشێكی ئارام و تایبەتمەند.
شایەنی باسە (جمعیە المشكاە الپقافیە) یەكێكە لە دامەزراوە زانستییە عێراقییەكانی سەر بە وەزارەتی خوێندنی باڵای عێراق كە لە ساڵی 1981 دامەزراوە.
