ژمێریاری

دیدی بەش:

بەشی زانستی ژمێریاری هەموو هەوڵەکانی چڕکردۆتەوە لە سەر بە ئامانج گرتنی پێگەیاندنی کادری ناوەندی نمونەیی سەردەمی و پێشکەوتوو لە بوارە تایبەتیەکەی خۆیدا ، هاندانی خوێندکاران بۆ ئاشنا بوون بە بیردۆز و هاوکێشە ژمێریاریەکان لە هەردوو بواری تیۆری و پڕاکتیکی دا بە درێژایی ماوەی هەر دوو ساڵی خوێندنیان.

پەیامی بەش:

بەشی زانستی ژمێریاری بە هەموو ستافە ئاکادیمی و هونەریەکانیەوە لە هەوڵی لۆژیکی بەردەوام دایە بۆ گەیاندنی سەرجەم ئەو ئەرکە زانستی و ڕاهێنان و پەروەردەییانەی کە پێویستە بێ جیاوازی بیگەیەنێت بە خوێندکاران لە ماوەی هەر دوو ساڵی خوێندنیاندا و ئاشنا کردنیان بە سەرجەم بەها و هاوکێشە ژمێریاریە سەردەمیەکان و پێگەیاندنی کادێری مامناوەندی و ئامادەکردنیان بۆ ئەوەی لە داهاتوودا ڕۆڵیان هەبێت لەناو حکومەت و دەزگاکانی حکومڕانی و سەندیکا و کۆمەڵە و ڕێکخراو و کۆمپانیاکان دا، لەم بەشەدا (زانستی ژمێریاری) دوای تەواو کردنی دوو ساڵی خوێندنی زانستی و وەرگرتنی دوو مانگ مەشقی هاوینە بەشێوەیەکی دروست  و ئەکادیمی کادری ژمێریاری پێدەگەیەنرێت کە شارەزاییەکی تەواوی دەبێت لەزۆر بواردا لەوانەش:

• کاروباری ژمێریاری دام و دەزگاکانی حکومەت و سەندیکا و کۆمەڵەو ڕێکخراوەکان .
• کاروباری ووردبینی .
• توانای بە کارهێنانی پڕۆگرامەکانی کۆمپیوتەر.
• بازاڕ و بزنس و بازرگانی.
• پلاندانان و گەشەسەندنی ئابوری وڵات.
• توانای بڕیاردانی ژمێریاریە بەرجەستەییەکانی کەرتی حکومی و تایبەتیەکان.

ئامانجی بەش:

 ئامانج له‌ كردنه‌وه‌ی ئه‌م به‌شه‌ بریتیه‌ له‌ پێگه‌یاندنی كادری تەکنیک کار و مام ناوەند لە بواری ژمێریاری و بانکی دا، ڕەخساندنی هەلی خوێندن و فێربوونی زانستی ژمێریاری و دارایی بۆ گەنجانی دەڤەرەکە بەتایبەتی و هەرێمی کوردستان بە گشتی تا بتوانرێت خزمەتی زیاتری وڵات بکرێت و برەوی زیاتر بدرێت بە دام و دەزگاکانی هەرێم و ڕاپەڕاندنی ئیش و کارەکانیان لە بواری ژمێریاری و دارایی و ووردبینی و بانکی دا، ئاشنا کردن و فێرکردنی خوێندکاران بە پڕۆگرامەکانی کۆمپیوتەر.

خوێندکار پێش ئەوەی بێتە ئەم بەشە پێویستە شارەزایی لە چیدا هەبێت:

خوێندکار پێش ئەوەی بێتە ئەم بەشە پێویستە شارەزاییەکی باشی هەبێت لەهەریەک لەبوارەکانی (زمانی ئینگلیزی ،زمانی عەرەبی، بیرکاری ) هەروەها بەشداری بکات لە چەند خولێکی ڕاهێنان لە بواری ژمێریار و بازرگانیدا بۆ زیاتر ئاشنابون لەبوارەکانی ژمێریاری دا.